【專訪】陳輝陽教你創作秘訣 寫咁多情歌唔一定係情聖
撰文：史順宜
出版：更新：
作曲人陳輝陽曾為香港樂壇創作不少膾炙人口金曲，當中有不少夭心夭肺的共鳴作品。這些作品除了在K場hit爆，更成就了香港多位天王天后（如：鄭秀文、陳奕迅、楊千嬅等等）的樂壇地位。要創作多首淚崩情歌，難道他真的如歌曲內容般在愛情路注定失敗，經歷多次情傷？
「好多人問我創作靈感從何以來，我覺得每個人創作都是受某些事物影響，不過成功嘅作家一定係『大話精』！」陳輝陽說。
攝影：葉嘉豪、陳順禎
還記得想當年在樂壇頒獎典禮常常聽到歌手在台上要多謝「夕陽組合」，當時的林夕與陳輝陽的確合作無間，郎郎上口的情歌作品多不勝數。不過要創作這些作品，並不一定是「情聖」的專利，創作終究是創作，在陳輝陽心目中一位大師級的創作人最重要懂得「吹水」及「講大話」：「其實做創作好多嘢都需要imagination（想像），有時我哋創作並唔係想像一件事，反而係一個音符，而呢個音符入面包含有好多不同嘅情緒、情節喺入面。所以我認為一個真係識得創作嘅人一定要無中生有。識創作嘅人係最叻嘅『大話精』我唔係講笑，我真係咁諗。我發現所有大師級創作人，如最hit嘅小說作家東野圭吾、村上春樹，佢哋最叻嘅係無中生有，因為創作永遠離不開四個字──天馬行空。」
陳輝陽坦言識創作嘅人最叻係「講大話」。（攝影：陳順禎）
「天馬行空」這四個字一聽就覺得是「藝術家」口吻，不過陳輝陽坦言自己是真正的「商業」，「試過有位歌手經唱片公司搵我寫歌，呢位男歌手好多人認識，結果我推咗佢。我知道當時呢間唱片公司被拒絕之後係唔高興，但坦白講其實我日日都有寫歌，我只不過唔想將千篇一律嘅歌畀呢位歌手唱，不過佢哋未必理解到我呢個想法，可能因為呢件事令到好多人覺我好『藝術家』。其實我覺得自己嘅做法並唔係藝術家，呢個反而係真真正正嘅商業，要商業反而唔可以交一啲個個歌手都唱到嘅嘢出嚟。」陳輝陽稱。
談到香港樂壇，唱片公司會否給予幕後人很多限制，陳輝陽認為：「呢個問題我覺得係相向。例如：唱片公司叫你幫歌手寫歌，當然會有佢哋嘅原意。但我亦可以寫完首歌問唱片公司會唔會要，其實我係好歡迎大家雙向。」
正如陳輝陽所說，創作人與唱片公司及歌手之間的合作很多時都是雙向的，他在片中也提到他更喜歡與歌手合作的「順其不自然」，未知大家又能否參透這句說話的箇中奧妙呢？
陳輝陽不認同自己是「藝術家」。（攝影：葉家豪）