鄭欣宜拍片即場邀請演唱會嘉賓　竟然唔係許廷鏗？

鄭欣宜（Joyce）最近積極籌備自己首個紅館個人演唱會，除咗練歌排舞之外，佢仲親自去邀請演唱會嘉賓。一般歌手都唔會事先透露演唱會嘉賓，因為要保持神秘感，但欣宜今次不但止公開，仲拍埋片，即場向對方發出邀請，做法都算新穎。

鄭欣宜演唱會鄭少秋做嘉賓？ 欣宜：佢都喺乖乖地台下睇我啦！

欣宜自拍咗兩條片放上網，佢話：「今日我特登撞上嚟，因為我知道有一個好特別嘅人綵排緊。」欣宜拎起一袋自家品牌的曲奇，話用嚟賄賂該名歌手，然後走進band房，一路行到尾，答案終於揭盅，原來佢想邀請嘅嘉賓係側田。欣宜遞包曲奇畀側田話：「This is a bribe(賄款)，你願唔願意做我嘅演唱會嘉呀？」側田聞言搖頭話：「唔夠呀呢度。」欣宜馬上話整十打曲奇畀佢，仲好豪咁話每一個band member都有一袋。欣宜打溫情牌話今次係佢第一個紅館演唱會，側田聽到就話覺得好緊張，同時亦好榮幸受邀，而且欣宜曾經做過佢演唱會嘉賓，邊有得托手踭。

眾所周知欣宜同許廷鏗Friend過打band，佢哋仲自稱係「異父異母低能巨孖寶」，有粉絲留言話以為欣宜會邀請許廷鏗，仲話好想見到「鏗鏗」咁話。不過其實唔使擔心，欣宜個演唱會連開兩場，可能其中一場就係「鏗鏗」呢。