【專訪】FreshLife搣「Session底」 謝偉倫:夾Band先滿足到自己

撰文:
最後更新日期:

樂隊FreshLife成立了一年多的時間,或許對你仍然有點陌生;但當中主音謝偉倫卻是一個較熟悉的名字。也許你也在想,謝偉倫曾參加《中國新聲音》,推出過一連串作品,為何毅然轉為樂隊的姿態進入樂壇?

原因很簡單,他說:「本身寫嘅歌就係為樂隊而設,只有夾Band先滿足到自己!」

攝影:黃寶瑩

因為《FreshLife》先有FreshLife

FreshLife成位成員,主音及結他手謝偉倫(Alan)、結他手Vincent、Bass手Logout及鼓手Nick,全部都是「自然熟」,於謝偉倫個人姿態時已有合作,一起踏足不同舞台。直到《FreshLife》一曲出現時,4人合力將Alan的「Rock底」Demo,變成大家現時聽到的Groovy、陽光感覺很重的版本。

Alan說:「係《FreshLife》令我哋覺得,點解我哋唔夾Band呀?都一齊花咗咁多心思,夾Band啦,仲搞咩啫!」

謝偉倫由從前的個人姿態,決定以樂隊FreshLife姿態進入樂壇。(黃寶瑩攝)

夾FreshLife要搣甩「Session底」

Alan現時主要為內地劇集製作配樂及主題曲,而Nick及Logout也有擔任Session樂手的工作,他們也認為FreshLife讓他們做回自己,能夠將自己的想法、音樂喜好、專長呈現在作品之中,不需要再被「定型」。

話雖如此,夾Band初期也需要時間適應,Logout說:「開頭夾FreshLife要搣甩『Session底』,因為以前好多時候歌手嚟到,Band Leader畀譜你就照足彈,冇咩特去構思點樣參與呢件事。」Nick補充:「呢個都係我嘅難題,我以前係『煮到埋嚟就食』嗰啲,但依家好似個廚師咁,要諗下點樣去煮好佢。」

FreshLife成員(左起):鼓手Nick、主音及結他手謝偉倫、Bass Logout。(黃寶瑩攝)

四個人一聚埋就「黐咗線」!

正所謂「夾Band先夾人」,但「夾人」對FreshLife來說根本不是問題,Alan笑言:「我哋四個一聚埋就黐咗線,估唔到咁一拍即合!旁人以為我哋夾咗好耐,其實我哋識咗冇耐㗎咋,只係比《FreshLife》首歌面世耐少少,哈哈!」

四人關係要好,家庭、感情、私事無所不談,音樂上自然合拍,不過創作方面也需要「互相抗衡」。Alan及Logout可謂樂隊中創作的主導,雖然有時會吵得面紅耳熱,但目的都是為了建構出好作品,Alan說:「有時我想做啲好特別嘅類型,但Logout就會抽離一下去諗,你想啲歌係人哋會明,而唔係淨係得自己明㗎嘛!」

雖然結他手Vincent當日缺席,但他們笑言四人一聚頭就「黐咗線」。(黃寶瑩攝)

謝偉倫被趕出家門 「你繼續玩啦,Bye Bye」

為玩音樂你可以去到幾盡?Alan曾做過兼職司機,家人極力反對,甚至將他趕出家門,Alan憶述:「佢哋直頭同我講『你繼續玩啦,Bye Bye!』,係去到咁嘅情況!但我諗唔到一個理由唔玩!」

他續說:「我以前係搵到錢,有安穩生活,但唔會得到滿足感,我亦唔會返去以前嘅工作。就算依家要捱,但砌完首歌之後個喜悅,係我哋四個人一齊開心!呢行你唔專注玩冇得玩,我又唔係做唔到,點解唔做呢?」

即使家人反對,甚至被趕出家門,謝偉倫也沒有放棄:「諗唔到一個理由唔玩!」(黃寶瑩攝)

唔出EP,一出就要出大碟!

作品如呈現自己的想法、理念,是一隊樂隊的重心,FreshLife也不例外。有樂隊會先推出EP,慢慢再到大碟,但FreshLife卻要一步到位。Alan解釋:「聽碟最開心嘅地方就係由頭聽到落尾,會有『WOW』嘅感覺,係講緊成個Flow咁去。」Logout補充:「如果出EP,就會變成keep住EP,唔知幾時出大碟,到時就會變單曲精選,哈哈!」

Alan希望將自己一路走來的經歷化作歌曲,但同時也有點無奈:「雖然玩音樂係好開心,但係又有啲無奈,點解我要做咁多其他嘢去support呢件事,而唔係好專注咁做呢?好似打工買夢想咁!」

即使感到無奈,但FreshLife仍然堅持將最好的元素放進歌曲,Logout透露:「有一首未曝光嘅作品,雖然係情歌,但當中我編咗個弦樂四重奏,係『真拉雞』!」Alan說:「因為我哋着重個意境,中間Solo位會有電影配樂嘅感覺。希望聽眾會有一個置身另一空間嘅感覺,而我哋就喺度建構緊個城市。」

「一出就要出大碟!」FreshLife希望向聽眾呈現一個完整的概念。(黃寶瑩攝)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。