G.E.M.開投資公司又做MV導演 自嘲似老人家：每日未夠8點就醒！
撰文：黃浩晉
出版：更新：
《新城勁爆頒獎禮2018》今日（22日）於將軍澳舉行記招，一眾歌手及新人均有到場支持，席上頒發兩個獎項，分別是由G.E.M.奪得「勁爆國語力歌手」，以及張敬軒憑《天才兒童1985》奪得「勁爆播放指數歌曲」。記招尾聲G.E.M.更獻唱近期大熱歌曲《倒數》，令圍觀fans嗌到拆天。
G.E.M.今日出席新城頒獎禮記招，更奪得「勁爆國語力歌手」，並即場獻唱《倒數》。(葉志明攝)
G.E.M.早前獲BBC選為本年度百大女性，更是榜上唯一中港台藝人，「百足咁多爪」的她接受訪問時都表示自己近期「忙得滯」：「最近好多嘢搞緊，覺得有啲忙得滯。之前去美國除咗去NASA，仲去咗洛杉磯見一輪投資者，因為呢一年幾自己開投資公司，成日覺得自己分身緊，唔止淨係做歌手。」她提到要充當新歌《那一夜》MV導演：「當時拍完出嚟效果唔係好滿意，拿拿聲打電話俾台灣導演朋友，一個禮拜要完成由零到拍完。每次都一頭煙，但每次都驚險度過都覺得自己好勁！」
G.E.M.表示自己近期「忙得滯」，仲忙到每日未夠8點就起身。(葉志明攝)
又到頒獎禮季節，G.E.M.對自己《倒數》一曲充滿信心，因為網上反應突破自己預期：「我諗《倒數》呢首歌應該成績最好，因為喺YouTube放咗2、3個月已經4100萬點擊，係我呢10年歌手生涯上升速度最快嘅一首歌！」另外問到她的YouTube Channel訂閱人數突破100萬人，對此她亦感到出乎意料：「早前收到YouTube由美國寄嚟嘅金獎牌，諗返起10年前第一次自己Upload金魚嘴條片，差唔多個個都叫我扮，Eason、基仔都同我一齊扮，真係意想不到！」
G.E.M.對《倒數》一曲充滿信心，因為在YouTube上傳2、3個月已有4100萬點擊率。(葉志明攝)