【堅.詞】梁栢堅填詞玩得啜核 全靠八個字:吹你唔脹,估你唔到

撰文:
最後更新日期:

「有時啲人會將歌詞變成座右銘,咁樣去『毒害』人哋嘅人生係非常好玩㗎!」竟然有填詞人想以歌詞「毒害」聽眾?本著「吹你唔脹,估你唔到」這八字真言創作,表面玩世不恭,卻又寫出能打動你的歌詞,他就是梁栢堅。

攝影:鄭子峰

「試鐘」、「彈鐘」乃必經階段:我試過冇原因俾人彈十四、五次 

雖然填詞人這個行業如殺手一般神秘,但如各行各業一樣也有試用期。梁栢堅當初因落酒吧認識Zarahn而入行,看似順風順水,但同樣經歷過「試鐘」、「彈鐘」的階段。「我試一次首歌冇出到街,彈咗十四、五次,咁係一個鍛鍊嚟嘅。一來鍛鍊自己嘅心態,二嚟要揣摩監製想要乜。其實俾人彈得十幾次,即係自己未得囉。」

話雖如此,但被拒絕總有原因,到底梁栢堅當時何故被彈十幾次?答案實在令人哭笑不得:「衰咩彈十幾次?衰新入行囉!佢都唔需要同你講啲咩!」他引《喜劇之王》的劇情解釋,導演將你「舞嚟舞去」,白鴿頭向完左又向番右,最後取消拍攝,你卻把手燒焦。「監製同導演一樣,無X敵㗎嘛!不過之後咪學精對方想要啲咩,冇理由你想食飯我俾個麵你㗎嘛!」

梁栢堅初入行試過被彈回頭十多次,他笑言因為衰在初入行。話雖如此,他卻視之為磨練。(鄭子峰攝)

惡搞又得,認真又得,把尺要點擺? 「自己開心就得啦!」

就算你記不起梁栢堅認真的詞作,也定必記得他的惡搞作品,事關久久他便會在社交網絡上載改詞,題材之廣無奇不有,鬼馬下流,政治民生,總之有feel就寫。何以惡搞得如此得心應手?全賴自小訓練:「十歲、八歲就開始改歌詞,做咗幾十年喇,哈哈!」雖然惡搞詞多數無聊聊,但可以激發思維,有時要寫正經作品前,他也會先惡搞一番「撻著副偈」。

惡搞詞看似「與生俱來」的技能,那麼他何時開始正經看待詞作?梁栢堅表示全因林振強,他引林子祥的《丫嗚婆》作例子,歌詞反其道而行,告訴大家不要追靚女,要選擇「丫嗚婆」作對象。正當大家摸不著頭腦,但又被林振強說得通,這正是玩味之處。「吹你唔脹,估你唔到吖嘛!哈哈!」

「吹你唔脹,估你唔到吖嘛」是梁栢堅創作的八字真言,不過任何創作到頭來最緊要自己開心。(鄭子峰攝)

詞壇「一蟹不如一蟹」?   「呢樣嘢冇答案㗎!」

「以前啲歌/詞好啲囉,依家啲歌都唔知似咩!」相信大家都由長輩口中聽過這番話,身為當代詞人,梁栢堅又有何感受?「冇答案㗎!呢樣嘢係永恆不滅,上一代總覺得下一代唔好,下一代總會覺得上一代食古不化。分分鐘宋朝都有人話文天祥九唔搭八,大讚唐朝李白幾X勁!」話分兩頭,對新一代詞人來說,面對排山倒海的批評確實令人洩氣,但總好過香港人不再談論,變成個個都聽K Pop,廣東歌變得不值一提。不過討論歸討論,栢堅也有一點提提大家:「善意批評冇所謂,下下老母就無謂啦,哈哈!」

詞壇一代不如一代?梁栢堅話:「冇答案㗎!呢樣嘢係永恆不滅,上一代總覺得下一代唔好,下一代總會覺得上一代食古不化。」(鄭子峰攝)

創作空間被箝制? 「其實懸崖邊係好遠㗎,行出少少唔會死」

梁栢堅不乏談社會議題的詞作,尤其為樂隊Kolor填寫一系列「Law Of 14」作品可謂擺明車馬,面對言論空間收窄,到處自我審查,他又會如何自處?「敏感呢樣嘢,係個人自己覺得敏感啫。陳百強有首歌叫《一生不可自決》,蘇永康有首《獨立宣言》,其實流行曲用咩字都得㗎嘛!其實懸崖邊係好遠㗎,行出少少唔會死嘅,我覺得做咗先啦,唔需要諗咁多。」這就是創作可貴的地方,不是要大家每次也打「擦邊球」,但趁尚有廣闊空間發揮,何必在這一刻綁手綁腳呢?

「其實懸崖邊係好遠㗎,行出少少唔會死嘅,我覺得做咗先啦,唔需要諗咁多。」.(鄭子峰攝)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。