【01眾樂迷.專訪】潘源良二次創作心法:有斧鑿痕跡就唱得唔過癮

撰文:黃浩晉
出版:更新:

「我用廣東話嚟維生都幾十年,廣東話同我一直有不解緣。」資深填詞人潘源良馳騁詞壇三十多年,創作題材風格多變,浪漫感性、跳脫鬼馬,統統曾活現過在他筆下。2015年舉辦過作品展,邀請重量級歌手獻聲,帶樂迷回顧他的填詞生涯;下月他卻要挑戰廣東話填詞的可能性,舉行以二次創作及惡搞歌主導的音樂會——《生炒廣東話之有辣有唔辣》。「今次音樂會其中一個焦點,我係想睇下廣東話同我哋嘅生活、創作、表達方法,可以編織乜嘢有趣嘅事!」

「我用廣東話嚟維生都幾十年,廣東話同我一直有不解緣,我希望耳熟能詳嘅旋律再活一次。」(黃寶瑩攝)

二次創作的化學作用 「我想令耳熟能詳嘅旋律再活一次」

「大笨象會跳舞,馬騮仔會上樹,狐狸會……」只看歌詞大家也懂唱下去,一首求學時期流傳至今的「口水歌」成功洗大家腦,甚至「妹仔大過主人婆」令你忽略了原曲是源遠流長的《馬車夫之歌》。「既然大笨象都會跳舞咯,點解唔可以『大白象怕計數呢』?」正因二次創作空間,亦是普羅大眾抒發對民生議題不滿的渠道,潘Sir便出馬將這段旋律改成諷刺大白象工程的《大白象》。「呢首歌本身就俾人二創咗一次,今次就係一個再循環,我希望喺耳熟能詳嘅旋律之上,換成貼近時事同大家生活嘅歌詞,睇下可唔可以令首歌再活出來。」就是這個想法,衍生出《生炒廣東話之有辣有唔辣》音樂會,歌單全都是二創歌曲,諷刺時弊之餘也望博君一笑,畢竟在香港地必須學懂苦中作樂。

「既然大笨象都會跳舞咯,點解唔可以『大白象怕計數呢』?」就是這個念頭令潘源良將《馬車夫之歌》改成《大白象》。(黃寶瑩攝)

視二次創作為遊戲 「有斧鑿嘅痕跡就唱得唔過癮」

讀者可能會想,一個音樂會全是二創曲目,光是改詞就要攪盡腦汁,還要背歌詞與樂隊綵排,負荷相當巨大。不過,潘Sir卻處之泰然:「二創係一種輕鬆嘅遊戲,唔係要坐定定,閉關修練出嚟嘅!因為你越著力,要堆砌份歌詞,就會有斧鑿嘅痕跡,唱起上嚟唔過癮。」他形容,只要有一顆種子便可以順理成章發展下去,抓住行住坐卧間閃過的一個念頭,歌詞便成形,這就是二次創作的魅力。同時,正因為這份隨性,才會令大家朗朗上口。

「二創係一種輕鬆嘅遊戲,唔係要坐定定,閉關修練出嚟嘅!因為你越著力,要堆砌份歌詞,就會有苦作嘅痕跡,唱起上嚟唔過癮。」(黃寶瑩攝)

望音樂會打破「同溫層」 向年輕人展現廣東話的魅力

今時今日K Pop當道,90後、千禧後日Loop夜Loop的不再是廣東歌。其實也無可厚非,因為現時大眾聽歌口味不再如廿年前由傳媒主導,變得碎片化,聽眾有更大空間選擇自己的「菜單」。那潘Sir會否覺得今次身負重任,要再次「推起」廣東歌?「其實唔知㗎,當然我都希望接觸到唔同階層嘅受眾,或許可以突破某啲同溫層。廣東話同我一直有不解緣,今次音樂會嘗試用咁多年嘅經驗、趣事,同觀眾交流,話唔定佢哋對廣東話填詞都好有興趣。」