【堅.詞】《一雙手》爆紅全靠DSE 陳詠謙:一朝多咗十幾萬Views

撰文:
最後更新日期:

《別來無恙》當中一句「我現時自己肯做飯」,令陳詠謙成為近年談論度最高的填詞人,面對網上各種聲音,甚至有人以「陳詠謙之亂」形容其作品,他有否想過為自己平反?「冇得平反㗎喎,歌係寫畀大家聽,而好多人踴躍發聲批評,我只能夠檢討,唔係可以點?如果我呢一刻行出嚟,覺得自己已經係最好,咁我就玩完㗎喇!唔係事業玩完,係人生玩完!因為我只會不斷倒退。」雖然外界充斥不同聲音,他只關心一件事:「最怕做咗咁多年,一路都冇乜意義。但我相信唔係嘅,亦都有好多人主動話我聽唔係嘅。」

攝影:黃寶瑩

一句「我現時自己肯做飯」令陳詠謙成為焦點,面對種種聲音,他坦言只能檢討、反省,才可繼續前進。(黃寶瑩攝)

點解要寫「我現時自己肯做飯」? 「唔係千挑百選,都係百挑十選決定寫」

《別來無恙》一句「我現時自己肯做飯」引發軒然大波,更有網民惡搞成「瘋狂做飯版」,當然陳詠謙也聽過,訪問期間他亦不避嫌笑著唱兩句。笑容背後,藏著陳詠謙私人感情經歷,他坦言還未被惡搞或廣泛談論前,這首歌在他心中有個特殊地位。歌曲是告訴舊情人,自己已經改過,由大男人變得懂得重視身邊細節,關心身邊人。歌詞由不同畫面片段組成,生活細節瑣事才是主角,正如他比以前變得敏感細膩。

讀出每句歌詞時,他收起唱惡搞版的嬉皮笑臉,帶點落幕地喃喃自語,一邊檢視自己過往經歷。

「恃住雄辯滔滔 隨便的把你喝罵……」
「試過,緊係試過啦……」

「王菲的孤寂 多麼孤寂……」
「嗰張舊CD,咪就係《只愛陌生人》嗰張CD……」

「同一個旋律我寫咗六句歌詞,有好多選擇。『我現時自己肯做飯呢』一句,就算唔係千挑百選,都係百挑十選決定將呢一句寫落去。」

陳詠謙身後的村口士多,曾是他重要的創作基地,《我的宣言》、《碌卡》等作品也於此誕生。(黃寶瑩攝)

沒想過為「陳詠謙之亂」平反 「係在意先會鬧得咁甘㗎啫!」

有網民以「陳詠謙之亂」形容他的詞作,但《高山低谷》、《一雙手》、《碌卡》等為人津津樂道的作品也是出於他筆下。網民反應如此兩極,他本人有否想過為此事平反?「係在意先會鬧得咁甘㗎啫,正所謂『恨鐵不成鋼』嘛,哈哈!」他續說:「平反我真係唔會囉,如果呢一刻我行出嚟,覺得自己已經係最好,咁我就玩完㗎喇!唔係事業玩完,係人生玩完!因為我只會不斷倒退,我只能夠檢討。」

面對各種聲音,陳詠謙視之為修練,他明白到不斷創作,不斷前進是自己的責任,亦希望藉機會學習成為一個堅定不移的人。同時,他亦體會到為免腦內的「審查員」殺死「作家」,身為創作人不宜參與評論。「要啱永遠都唔係難事,只要跟住前人做過嘅嘢,通常你都唔會犯咩大錯。但你如果想『有趣』啲,就要離經叛道一啲,或者不守規矩,碰壁又好,撞板又好,唔應該畀個箱困住自己。」

「係在意先會鬧得咁甘㗎啫,正所謂『恨鐵不成鋼』嘛,哈哈!」雖然捱轟不好受,但陳詠謙選擇積極去面對。(黃寶瑩攝)

《一雙手》成大熱要多謝DSE? 「要十幾萬人好專心同時聽一隻歌只得呢個機會」

「一雙手,只要握成拳頭能捱下去」這句歌詞成為不少人鼓勵自己,鼓勵他人的說話,出自陳詠謙所填的《一雙手》,同樣是他多年前的親身經歷。但原來現時大家聽到的《一雙手》是第三稿,與第一稿相距八個月,陳詠謙覺得不只要「寫佢好」,而是要花更多時間去處理,呈現歌曲應有的面貌。加上初稿名為《失聯》,恰巧碰上馬航事故,因為「唔好意頭」所以改了又改。

《一雙手》本來不是大Plug作品,推出幾星期後突然爆紅,幕後推手竟然是DSE文憑考試,就連陳詠謙也意想不到。「有一朝早突然好多人喺instagram tag我,YouTube上面突然多咗十幾萬views嘅!事後先知,當日DSE聆聽考試前有個節目揀咗《一雙手》去播,我相信今時今日要十幾萬人好專心同時聽一隻歌,係得呢個機會,呢個故事好特別!」

相信今日陳詠謙回看「一雙手只要握成拳頭能捱下去」一句,會有另一番體會。(黃寶瑩攝)

後記:一雙手只要握成拳頭能捱下去

陳詠謙的創作大多以自身經歷出發,無論外界評價褒或貶,只少作品能向自己、歌手、監製交代。或許他回看「一雙手只要握成拳頭」這句,能再次為自己打氣。曾四奪填詞人大獎,近年卻成為眾矢之的,心情猶像坐過山車一樣,他也在經歷自己的高山低谷。要取悅全世界根本不可能,但只少他能找到自己的空間,告訴大家「我叻仔我可以肥」。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。