鄭伊健與師弟Nowhere Boys合唱新歌 《時光歲月》亮相出演MV

撰文:
最後更新日期:

樂隊Nowhere Boys的主音Van獲偶像鄭伊健邀歌兼合唱新歌《時光歲月》,伊健更亮相MV大派彩蛋,Van高呼「成就解鎖」!

由主音Van、鼓手Nate、結他手Kenneth、小提琴手Fisher和低音結他手Hansun組成的樂隊Nowhere Boys,最近與同屬寰亞唱片公司的大師兄鄭伊健合唱新歌《時光歲月》,原本這歌由伊健獨唱,但他聽完Demo後提出合唱,本身是「麵粉」的Van生日當天得知喜訊後開心到想喊,豈料完成錄音後,伊健還爽快答應一齊拍MV,實在是驚喜一浪接一浪。

Nowhere Boys最近與同屬寰亞唱片公司的大師兄鄭伊健合唱新歌〈時光歲月〉。(KKBOX授權使用)

拍攝當日,平時口水多過茶的Van面對伊健立即變乖寶寶,更被隊友爆料「迫導演加戲」,Van立即解釋:「其實劇本一早寫好咗,我只係溫馨提示導演有呢場戲啫!(聽講你噚晚敷Mask打孖上喎!)我梗係要整好啲個樣,咁先至襯得起伊健架嘛!」伊健立即醒他兩招,說:「我初出道嗰陣出鏡故意唔化妝,觀眾見到個個上鏡都咁靚,寧寧舍舍有一個唔化妝黑麻麻殘殘地,咁先夠特別!」每次埋位Van都異常緊張又姿整,遇上任何反光面都左照右照,在場工作人員為他鼓掌打氣,伊健見狀親自為他試位和睇playback,Van好感動。

Nowhere Boys主音Van(左)與鄭伊健合照。(KKBOX授權使用)

《時光歲月》是Van為伊健度身訂造,尤其歌詞加入了大量伊健的經典情歌歌詞,一聽就知道是「伊健專屬」,難得他竟然將情歌歌詞融合變成一首正能量滿瀉的勵志歌,而MV亦選在校園取景,Nowhere Boys成員和伊健分別飾演教師和學生,鼓勵年輕人勇敢追夢和珍惜友誼。

Van說:「最初一心為寫畀伊健獨唱,旋律和歌詞都度身訂造,威逼利誘其他兄弟俾我完成夢想。後來伊健提議合唱,呢個消息係我今年最好嘅生日禮物。」身邊的伊健說:「對我嚟講都係好有意義嘅禮物。」歌名〈時光歲月〉由伊健命名,行動代號「Nowhere Boys along with鄭伊麵」,伊健說:「呢首歌由佢哋寫音樂和填詞,啲歌詞好有趣,將我哋兩代人連埋一齊。大家都知我咩年紀架啦,雖然我哋嘅年紀有啲距離,但理想和理念可以一樣,唔受年代或年紀限制,唔使分得咁清楚,音樂係可以一齊玩,我覺得呢首歌好適合一班人一齊唱。『夢想』就係呢首歌嘅理念。」

講到夢想,Nowhere Boys成員笑指Van,說:「Van今日真係夢想成真,佢依家好懊惱要搵下一個夢想了!」Van只好傻笑。伊健則透露演員和歌手都是夢想之一,如今也是夢想成真。

而成員Fisher和Kenneth異口同聲:「我哋夢想係一直可以寫自己想寫嘅歌和,可以唱心中想唱嘅歌,就係最大夢想。」而在美國讀書的Nate為了追逐音樂夢,經常香港美國兩邊飛夾Band,但他表示為了夢想樂在其中。期間Hansun一直保持cool樣稍為點頭認同,Van向伊健解說:「Hansun呢個表情已經係最興奮架啦,佢平時無表情添呀!」非常搞笑。

【本文獲「KKBOX」授權轉載,按此收聽文中歌曲,立即下載KKBOX App收聽4000萬首中外日韓歌曲!】



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。