【專訪】作品訴近半年心聲 卡式帶樂團:林鄭真係令大家connect

撰文:
最後更新日期:

「黑非黑灰飛的真相結局隨著渺小/光非光修飾陰影裡缺憾被上色了」出自Cassette卡式帶樂團的《黑白》,雖然不是電台流行榜的熱播作品,但道出大部份人對近半年社會事件的心聲。面對是非顛倒的紛擾世情,Cassette希望籍此曲成為同路人情緒的出口,沉重、沮喪等感覺宣洩過後,重拾力量繼續做應做的事。

攝影:梁碧玲

《黑白》的初Demo最初也叫做BLACK & WHITE,很久以前便寫下,原來就想寫對立強烈的題材;恰巧遇著剛剛,決定製作時便碰上社會事件發生,順理成章衍生出《黑白》,希望憑良心將眼見的事實記錄低。

 Programmer Johnny本身打算執筆填詞,但生怕因為心情沉重得未能必處理自己的情緒,他說:「雖然我會盡量控制自己情緒,但基本上你要個人好emotional先寫到好嘅作品,如果唔係就係交行貨。但你一進入嗰個狀態,你嘅思緒停唔到,即使你個人唔喺條街,你個腦都喺條街,好難抽離到。」所以樂隊邀請合作過的填詞人吳倩怡執筆,以近半年的所見所聞及切身感受出發,兩個單位同聲同氣,Johnny說:「以今次運動嚟睇,林鄭最叻真係呢一下,大家真係connect咗!」他透露往後創作方向仍想扣緊社會事件:「唔止記錄身邊嘅事,亦係情緒嘅出口。我相信生活喺呢個城市嘅人,無一唔感受到,無一唔受影響。」

Cassette與填詞人心有靈犀,以《黑白》一曲道出對這半年社會事件的心聲,他們說:「林鄭最叻真係呢一下,大家真係connect咗!」 (梁碧玲攝)

全職音樂人也算是「手停口停」的行業,主音Aeolus與Johnny除了演出,還有擔任樂手、教學、音響工程等工作,但這段時間很多演唱會都延期或取消,令他們收入大受影響。Aeolus原定在8月擔任許靖韻演唱會和音樂手,但開騷當日恰巧是星期六,地點又在旺角,演唱會基於公眾安全理由而延至11月舉行。她說:「10月、11月嗰陣真係篤晒手指,突然冇晒收入真係有諗過係咪要面對現實搵返份正職呢?」幸好情況在12月有好轉:「大家好似適應咗個社會環境,知道點樣運作,大家可以平衡返工作同要做嘅事。」不過Johnny都補充一句:「可以適應,但唔可以麻木。」

對於近半年的社會狀態,Cassette認為要適應但不能麻木。 (梁碧玲攝)

這段時間相繼有藝人因表態而遭網民口誅筆伐,Cassette會否擔心創作《黑白》後惹來封殺?他們則認為作為獨立樂隊包袱相對較細:「身為獨立樂隊真係可以控制到自己點做,講真都係憑良心,將我哋見到係事實嘅事記低,希望其他人有共鳴,或者有個抒洩都好,甚至畀其他國家嘅朋友聽都好。除咗自己日常嘅事要做,發現音樂方面原來都可以影響到別人,所以就即管憑良心繼續去做。」至於會否擔心失去內地演出的收入來源?他們則認為不要局限自己的視野:「世界咁大係咪一定要眼光收窄喺一個地區呢?點解唔放眼世界?如果將目光同收入來源放晒喺同一個地方,當嗰個地方有咩事嘅時候,咁我哋點算呀?咁樣太危險喇。」

「發現音樂方面原來都可以影響到別人,所以就即管憑良心繼續去做。」 (梁碧玲攝)

場地提供:
五勺 Goshaku

服裝提供:
Chill SJ



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。