譚詠麟《刻骨銘心世界巡迴演唱會》Part 2情不變篇，今晚（22/9）舉行尾場，譚詠麟唱到最後一首歌《講不出再見》流著兩行眼淚，感性說一句：「再一次多謝大家，我會永遠永遠記住呢一刻。」然後向觀眾送上飛吻，演唱會唱接近午夜12點圓滿結束。

其實在流淚前，譚詠麟已在台上道出一番肺腑之言，他講到今次演唱會在坊間帶來很大迴響，令他全晚不斷同大家講多謝，但他提醒有一個人，大家都應該要親自說一聲多謝︰「就係你哋都要多謝你自己，正如頭先華仔（劉德華）及克勤（李克勤）上來，佢哋表達咗份感覺，過去好多青春和回憶，係被時間磨滅咗，沖洗咗。今晚透過音樂及我嘅歌攞番唔少回憶。」

個唱似「失物認領處」尋回青春和回憶

校長更以「失物認領處」來形容每晚的演唱會。「有很多已經忘記，或者不敢去想的回憶，都竟然在今晚，喺呢度好似失物認領處咁，搵番唔見咗嘅嘢，我見到大家有開心跳跳下，有流兩行眼淚，甚至乎有啲一路聽住音樂，冇開過眼，完全浸淫番自己當其時嘅回憶片段。今晚喺度同大家打開回憶保險箱，你哋要多謝自己肯伸手入去呢個保險箱，攞番回憶同埋當時嘅青春出嚟，你哋會發覺當細味呢啲回憶之後，其實呢啲所有片段，都一直存在，保存喺心入面。」隨後便唱出經典金曲《愛在深秋》。