BIGBANG挑戰E-Kids同日開騷 Tommy：演唱會有GD元素
撰文：陳奕熙
出版：更新：
童年回憶同BIGBANG同日開騷？大件事，我買咗E-Kids又想去睇BIGBANG咁點算啊？（網上圖片）
「矛盾大對決」之童年回憶vs K-pop Oppa！潮流興集體回憶，但同時又是K-pop的天下，兩個極端相遇到底會有什麼化學作用呢？
話說BIGBANG來年一月會來港於啟德東九龍郵輪碼頭廣場開騷，過兩日就會開始優先訂票，各位VIP都已經準備就緒，買定十個F5隨時可以瘋狂搶飛。不過望一望發現，原來同一日（1月21日）開騷的還有網民表示「充滿童年回憶」的E-Kids。
到底用E-Kids飛換BIGBANG飛有冇得諗呢？（網上圖片）
記者致電Tommy談到與BIGBANG撞期，Tommy笑言自己也是昨日才發現，一半擔心一半覺得榮幸，更謂事隔多年開騷，可以與韓國天團撞到正，或者是一種緣分。
E-Kids早在半個月前已經開賣，Tommy表示已經買了九成，又不忘自抽一句：「好彩早啲開賣，唔係真係驚有人退飛，依家公司都未收到有消息話想退飛。」
反而Tommy仔就比較擔心自己搶唔到飛睇BIGBANG！他更表示想在Facebook開Post以飛易飛，「想話用十張我哋嘅飛可唔可以換3張BIGBANG尾場。（人哋成2000蚊張飛）係喎，咁要用15張先得喇，或者佢哋好似係6點開騷，我哋去睇完再開自己騷囉。」
唔係啩？Tommy仔仲想再扮G-DRAGON？（MV截圖）
Tommy更主動透露，演唱會中會有少少G-DRAGON的元素，到時可能反應是一面倒的「插」，「但希望到時效果出到嚟唔失禮啦。」
如果你是VIP，擔心BIGBANG會搶E-Kids客？傻豬嚟嘅，歌仔都有得你唱「一分鐘贈我一分鐘／保証我有觀眾／可以各有觀眾／捧場／將魅力左右右左移動」，Tommy仔話晒都「港版GD」，儲了十幾年fans，點會逼唔爆麥花臣？