姜濤親解新歌MV密碼 機場取景與摯友有關:起初仲想拍埋飛機起飛

撰文:劉傳謙
出版:更新:

「MIRROR夏日企劃」昨日(6/8)輪到姜濤接棒,推出今年第二首個人單曲《Dear My Friend,》,早前他已經預告過,希望將新歌獻給已故摯友阿Kin(花名:中峰),作為給對方的最後一封信,他指:「《Dear My Friend,》係為咗紀念一位離開咗嘅朋友,歌名亦都係我諗嘅,好想話畀大家知,呢首歌係專屬於佢;希望大家聽歌嘅同時,可以望下身邊嗰位最親近嘅人,好好珍惜佢哋。」

睇完《Dear My Friend,》MV後,相信「姜糖」都覺得好感動,今次就由姜濤親自為大家拆解MV入面嘅一啲密碼!

雖然姜濤一早有用作品悼念好友的念頭,但他坦言起初不願面對好友離世的事實,一度採取「拖字闕」,加上一時三刻難找到自己心儀的樣本歌曲(Demo),因此在選曲上花了很長時間。談起今次繼《孤獨病》後再與林奕匡(Phil)合作,他指:「最後聽到林奕匡寫嘅呢隻歌,一聽就有命中注定嘅感覺;至於填詞方面,因為林若寧老師係一位好擅長描寫故事嘅作詞人,所以我同監製Edward講,方唔方便搵林老師聽下我呢個故仔,睇下佢有乜感覺,然後就促成呢件事。」

繼《孤獨病》後,今次姜濤再與Phil合作。(資料圖片)

在昨晚推出的MV,姜濤在機場、籃球場、九展Star Hall等地方拍攝,而他與絕大部份觀眾一樣,最深刻的就是在靈堂讀信的一幕,就連自稱哭點高的他也淚灑當場,令一眾「姜糖」非常痛心。而令觀眾好奇的是,究竟姜濤手上的信寫了甚麼,令他不禁落淚?他解釋導演Sheng和Maggie本來希望自己親手為這位摯友寫一封信,然後在靈堂讀出,但最後信紙上竟然一個字都沒有:「我寫唔出,因為我有太多說話想講,所以我建議乜都唔寫,由得我自言自語。因為呢段時間好忙,我想藉著呢個機會,同佢好好傾偈,所以封信只係道具,其實喺MV入面我都係同佢分享我嘅近況、佢屋企人嘅近況,講講下就喊咗出嚟;另外因為製作組預備咗一副假棺材,完咗嗰場戲之後,我都一直望住個棺材係咁喊。」

本來導演要求姜濤寫一封信畀中峰,但係姜濤話當時寫唔到任何嘢,所以手上嘅呢封信其實冇任何字。

至於姜濤在MV中拿著籃球,導演認為二人少年因籃球結緣,為紀念識於微時的珍貴友情,決定加添籃球元素。而在機場取景,姜濤也親自解釋箇中原因:「因為我呢位朋友係做飛機維修師,所以我哋突登喺機場隔離拍攝奔跑場面,起初仲想拍埋飛機起飛,寓意佢嘅離開,可惜最後因為落雨拍唔到。」提到MV後段以卡通形式呈現好友,營造二人在籃球場對望的畫面,姜濤坦言:「真係根據佢嘅衣著打扮嚟塑造,對我嚟講感觸好大,雖然我唔知佢依家係以乜嘢形式存在,但係我希望佢可以喺呢個MV出現,我相信當下我係同佢對視,亦都希望佢睇完之後可以安息。」

點擊圖輯睇MV精彩鏡頭:

+47

更多關於《Dear My Friend,》文章:

姜濤新歌《Dear My Friend,》獻猝逝摯友 帶籃球出席喪禮最催淚

姜濤新歌獻已故摯友 填詞人林若寧公開對方千字文:讓我悲痛欲絕

你可能感興趣