專訪|Tyson Yoshi不強求與MIRROR合作:星光會被太陽蓋過

撰文:劉傳謙
出版:更新:

上回專訪除了解構Tyson Yoshi名字的由來,也談起如何看主流與獨立樂壇之間的界線。或許是自小在英國讀書的緣故,他坦言平日聽歌時,歌單都會以歐美作品為主:「Justin Bieber、LANY、Lauv等等,我有時都會聽返啲舊歌,即係Sum 41、Avril Lavigne嗰啲。最近好鍾意聽ONE OK ROCK,因為我冇聽Avril Lavigne一排,之後發現佢同ONE OK ROCK一齊唱過一首歌,之後就開始聽多啲,原來同我認識嘅日本嘢好唔同,尤其是佢哋比較新嘅歌係偏歐美啲,我聽完都醒唔起佢哋係日本樂隊嚟喎,癲喎!」
雖然歌單以歐美歌為主,但Tyson也有留意本地樂壇。他坦言自己較常聽陳奕迅的舊歌,喜愛麥浚龍(Juno)在作品中展示出來的反差,而近期也有留意林家謙、黃妍(Cath)的作品,當中又特別喜歡他們合寫的《我心中尚未崩壞的部份》,背後的理由很簡單:「好聽,但係唔係『魚蛋歌』,咁就已經好夠。」
撰文:劉傳謙
攝影:梁碧玲
髮型:Jim Tse@ Hair Corner
化妝:PuimingT makeup
服裝:Louis Vuitton
場地:The Fleming Hong Kong

Tyson Yoshi談起自己的音樂選擇。(梁碧玲攝)

專訪|Tyson Yoshi稱主流與獨立界線未打破:兩邊唔會有太多接觸

拒因數字金錢寫歌

當記者再追問喜愛Cath這首代表作的原因,Tyson坦言自己喜歡作品夠特別,又慨歎:「我真係覺得……『魚蛋歌』唔係唔好聽呀,但係好悶呀!聽完之後就會諗『點解又係咁嘅?』我係有呢個諗法,當然我明白佢哋點解存在,因為香港嘅音樂產業商業性好重,當然啦,要賺錢呀嘛,但係我唔鍾意啲人因為呢首歌掂,於是就寫2.0、3.0、4.0,一路磨落去。久而久之,成個市場就會淨係得呢樣嘢。」

在Tyson Yoshi眼中,Cath的《我心中尚未崩壞的部份》勝在沒有魚蛋歌的味道。(資料圖片)

在商人主導的樂壇下,很多唱片公司都會因為一首作品的成功,示意要不停按著同一個致富方程式創作,以賺取更多金錢,樂迷口中的「罐頭歌」、「魚蛋歌」也因此出現。這個想法正正與Tyson的創作理念背道而馳,眼見《Christy》的成功,他名言:「我唔會寫一首《Christy》2.0,作為一個歌手就move on啦,我已經作咗一首我自己覺得好好嘅作品。商人就會覺得呢樣嘢好賣,當然要入多啲貨賣多啲,但係音樂唔應該係咁。(畀多啲錢呢?)No!除非你喺創作上面會令我覺得係有得諗,如果你只係為數字好啲而寫一首歌,我都會好老實咁同佢講,我都唔覺得自己可以寫到一首2.0係好過原本嘅《Christy》。」

Tyson Yoshi絕不會寫《Christy》2.0。(梁碧玲攝)

《Christy》MV受麥浚龍啟發

除了Cath的作品,Tyson也非常喜歡Juno的作品。他坦言自《羅生門》開始,就被其創作概念吸引:「佢嗰種用音樂構思嘅世界觀,我係覺得震撼嘅,尤其是嗰種反差。所以我有時構思自己MV嘅時候都想試下做返呢種效果,例如《Christy》本身係甜蜜嘅,但係MV入面我係殺咗Christy,呢啲都係喺佢嘅作品之中得到靈感。好似《羅生門》咁,嗰種一下子就扭轉咗個故事,我就心諗『吓?黐線㗎?』我從來冇諗過音樂以外嘅嘢,嗰種計劃可以去到咁廣闊。我喺入面都學到唔少嘢,原來可以用其他方法玩。當然我嘅規模細啲,只係聲帶同MV,未做到好似一個十年嘅故事咁。」

2015年Juno的《羅生門》,啟發了Tyson Yoshi在視覺創作上的膽量。(MV截圖)

親解婉拒為姜濤作曲原因

Tyson將在9月27日現身亞洲國際博覽館Arena,與姜濤、林家謙和柳應廷一同現身《拉闊音樂會 風火雷電》,就在7月正式公布陣容後,不少姜濤的歌迷都希望看到偶像與Tyson同台的畫面。記得姜濤愛上Tyson的《Something》後,就決定與Gareth T.(湯令山)合作,推出R&B作品《Master Class》。Tyson坦言自己不敢相信姜濤會喜歡自己的作品:「一開始我以為係客套(說話)嘅,直至去到影拉闊海報嗰日終於見面,佢冇同我講,應該話佢唔夠膽同我講,真係好怕醜,第一時間係花姐同我講嘅,我都有啲驚訝。之後埋位,大家開始有交流,先發現原來佢真係有聽。我係覺得開心嘅,但係佢都係年輕人,比我後生,證明我係做緊一啲年輕人鍾意嘅音樂。」

姜濤喜歡R&B,也喜歡Tyson Yoshi。(資料圖片)

其實最初姜濤要開始製作《Master Class》時,Tyson曾收到花姐邀請,希望可以為姜濤作曲,不過他決定婉拒這次難得機會,並向對方推薦好友Gareth。除了當時尚在台灣,Tyson坦言目前未有興趣為其他歌手作曲:「到依家為止我都冇乜興趣純粹幫人哋製作一首歌,而我自己冇份唱。我記得一開始佢哋係搵我寫嘅,但係我覺得,自己何德何能呀?如果係寫嘅話,我個朋友Gareth仲勁啦!」

Gareth.T獲Tyson邀請,為姜濤作曲。(資料圖片)

Tyson也希望每一首作品都具備真實性,在製作前都希望探討創作背後的故事和親身經歷。不過當時他與姜濤分隔兩地,無法透過對談加深對姜濤的認識,也是其中一個婉拒合作的原因:「我要坐低同佢一齊傾,究竟佢係咪有故事想講,或者我係咪都有啲故事,大家都有共鳴,而可以寫一啲比較個人化嘅嘢,我唔要寫一份好行嘅歌詞。其實依家《Master Class》嗰份詞係真係為佢而作,呢一點好重要。」

Tyson Yoshi經過考慮後,只能放棄與姜濤合作的機會。(梁碧玲攝)

愛《Master Class》夠新鮮

Tyson也對《Master Class》讚不絕口,因為這種曲風在香港較少聽到,也是樂壇上需要的新衝擊:「呢個市場喺曲風上面係需要一啲新鮮嘅嘢,我覺得咁樣真係好好,以佢現有嘅影響力做呢啲嘗試,我覺得係合理,而且係好事。(姜濤嘅選擇會令更多人認識獨立音樂人?)都會嘅,但係最主要嘅都係要有好嘅作品,人哋先會發現到我或者Gareth,先至可以推廣出去。如果你本身都冇好嘅作品,呢啲事情都唔會發生。所以最重要都係畀心機做自己最鍾意嘅音樂,而唔係要做一首歌,諗住點樣會紅。」Tyson也有聽過姜濤過去的作品,認為《Master Class》在眾多作品中最吸引到自己。

姜濤眾多作品中,Tyson Yoshi都是最喜愛《Master Class》。(資料圖片)

只敢與朋友合作:唔會介意咁多嘢

至於日後會否再有機會在音樂上與MIRROR其他成員合作,他指一切隨緣,又解釋過去合作時,需要考慮作品能否經常用作舞台表演:「因為Hip Hop、R&B好鍾意featuring,但係問題在於,例如我依家要搞個人騷,其實有啲歌我都唱唔到,因為有啲朋友遠在台灣,唔可以同我合唱。所以我依家嘅做法係,大部份可以自己唱嘅歌就唱咗先,如果有朋友覺得有感覺,可以試下嘅,咁就一齊做。所有嘢都好隨緣,而唔係話我呢一張專輯要留幾多首畀嗰個人合唱,我唔贊成呢個諗嘢嘅方法。」

Tyson Yoshi希望與MIRROR做朋友後才談創作。(梁碧玲攝)

不論表演或是創作,主流樂壇不時會出現令人驚喜的合作陣容,Tyson強調自己與其他歌手合作會以感覺行先,需要雙方都感興趣才能成事:「我見過太多例子啦,有時你作為一粒星,喺一個太陽隔離,無論你有幾咁燦爛,你嘅光都會被太陽蓋過,出到嚟嘅效果,你會唔開心?我唔清楚。反而如果當係朋友咁一齊玩音樂,你只會覺得好玩,出到嚟唔會介意咁多呢啲嘢,因為你做緊嘅係同朋友做一首自己覺得滿意、開心嘅作品。」

期望愈大,失望愈大,唯獨與好朋友一同寫歌、合唱,才會不介意編排、名氣等事。(梁碧玲攝)

首度挑戰執導MV

問到日後發展方向,除了定期推出新作,並輯錄成專輯外,Tyson也嘗試執導自己新歌MV,目前也在籌備當中:「新歌係以普通話同英文為主,今次我會做MV導演,希望咩都試下。其實有時我諗歌詞,我喺腦入面都會有個畫面,希望將我平時諗到嘅嘢呈現返出嚟,自己又多個名做導演,哈哈!其實自己作品自己導,就代表當中有好多屬於自己嘅創作。(第一次?)之前嘅MV都放咗自己嘅創作理念入去,不過今次就參與得更多。我會同另一位朋友一齊做導演,之後我都會再搵朋友幫手,佢哋好多都有拍嘢,今次就當係一個企劃,同成班朋友一齊玩。」

Tyson Yoshi將挑戰做MV導演。(梁碧玲攝)