張衛健寸林敏驄多女過韋小寶　又擺校長上台：佢有蝦條就得

以往群星拼盤騷都冇乜吸引力，因為總覺得歌手上台交下貨仔就走人，都唔方會有賣力演出，不過隨住幕後音樂人「作品展」的主題式經營，令樂迷對呢類騷有一定興趣，潘源良有林子祥﹑小鳳姐﹑葉蒨文等巨星助陣，黃偉文有千嬅﹑傅珮嘉和趙學而等意外驚喜，Eric Kwok作品展都有陳奕迅﹑千嬅和軟硬等歌手出現，至於鬼才林敏驄一連兩場的《今天星閃閃35年時日如飛林敏驄腦交戰作品展演唱會》呢？四大天王﹑譚校長，全部冇影，唯有睇睇今晚有冇驚喜。

尾場順利在8:33開騷，一開騷舞台即噴火來一個下馬威，接著阿驄又和昨晚一樣繞半場和樂迷互動，Solo完電結他後，唱出的幾句歌竟是惡搞歌《酒杯敲你頭》，「酒杯敲你個頭，你阿媽話痛...」唱了幾句便與太極樂隊唱出一連串medley。

兩場的出席歌手之中，除了固有的李思捷外，都有好大變動，今場更有張衛健，阿驄話好多代的歌手都有唱過佢既歌，有一位仲成隻馬騮咁，接著張衛健就出場，並謂：「我又唔只做馬騮既，仲有方世玉、韋小寶，你就勁啦，韋小寶都唔夠你多女！」阿驄回應：假象嚟啫！」之後又玩返尋晚的事故，阿驄直指中央，話果到好好企，張衛健即話：「you jump I jump呀？」反應勁快，緊接就唱了《戀愛交叉》。

至於昨晚《全力扣殺》的上場陣容有變動，缺少了鄭伊健梁漢文，林敏驄又笑伊健被蒙嘉慧扣留，又話梁漢文在場館的「山頂」幫阿婆「洗鮑魚」，惹來全場歡笑，又和邵音音大講粗口搞Gag，至於今次更請來金像獎最佳原創電影音樂得主的波多野裕介。

其後阿驄唱出自己出道時的《自妳去後》，之後又再拿校長來講笑，說校長打畀佢要門票，10張握手位，「乜倫野呀，賣倫晒啦，佢唔係講粗口，而係驚我唔記得佢邊個」，全場又笑，更直言啲歌「個個都識唱，洗鬼搵佢黎唱咩」，接著又係李思捷扮嘢出場，模仿校長唱歌，阿驄介紹李思捷係「蝦條王」唱完後阿驄又補多句：「校長好怪既，有蝦條就得架喇！」

阿驄又拉了台下做觀眾的張智霖上台，唱出陳百強的《當我想起你》，Chilam笑言阿驄未有作過歌畀佢，阿驄爆肚：「未夠班」，馬上再補句：「我講我呀！」

全晚氣氛熱烈，不過當蔡一傑話哥哥的尾龍骨裂、肋骨移位，阿驄亦難免哽咽，表現傷感。