Celine父借《中國新歌聲》招客 港區冠軍不滿:以為佢好心幫我

撰文:史順宜
出版:更新:

最近因為在美國參加選秀節目《全美一叮》(America's Got Talent)而爆紅嘅Celine譚芷昀,最近除了成為焦點外,連帶她的爸爸譚順生(Dr. Steve)也人紅是非多。不過一波未平一波又起啦,第二季「中國新歌聲」香港賽區主辦,兼大會評委煒堅導演接受《香港01》獨家訪問時表示,Dr. Steve能夠在第二季「中國新歌聲」成為客席歌手評委身分,是因為協辦方HMV的拉線,基於大家是合作關係而「需要」接受Dr. Steve擔任客席評審之一。煒堅坦言Dr. Steve在評審參賽者時突然離題,拉攏參賽者到他所開辦的歌唱學校任教。「佢試過喺學員公開唱完後,當時坐喺評判檯嘅佢(譚順生)叫學員去佢到教唱歌,我事後曾經都有同佢講過,提佢呢啲嘢就唔好刻意講,對你都未必會有好處,我哋主力評論學員歌唱情況比較好。」

左起:譚順生,伍仲衡,鄭融,煒堅 (fb圖片)
+3

除此之外,第二季「中國新歌聲」香港賽區的冠軍張翊龍接受《香港01》獨家訪問時表示:「當我贏咗去慶功當晚佢(譚順生)話送兩堂唱歌試堂畀我,目的幫我揀歌到內地參賽,我以為佢好心想幫我,所以走上去,當日我本身遲到佢都堅持等我。上到去前前後後唱歌半嗰鐘左右。當時其實唱下唔同既歌,練唔同嘅歌。」

張翊龍對於由上譚順生的音樂堂變成訪問感到「嚇親」。(fb圖片)

「要我自己錄一段多謝DR. STEVE 嘅片」

其實到音樂學校唱歌是一種很平常的事,但奇怪的事情發生了:「唱咗半個鐘之後,佢(譚順生)就捉我去office嘅另一邊做訪問,由佢訪問我並拍片。佢仲一開頭就話呢個就係新鮮出爐冠軍,係「我嘅學生黎嘅」!我當時就心諗,吓!我完全唔識呢行,唔夠膽出聲,而我全程訪問都無乜點出聲,全個訪問就係得佢自己講。訪問入面佢又講上堂時教咗我啲乜野,之後又要我自己錄一段多謝DR. STEVE 嘅片,多謝佢幫我去揀歌等。我其實好新,當刻唔知道點做就跟佢稿讀。」

問到張翊龍於訪問後,譚順生有否提及訪問片段會放在那裡播出?張翊龍:「佢就無exactly講嘅,或者可能喺FACEBOOK 之類,但我都唔清楚,佢就無仔細講,我唔想太尖銳,我覺得我係蝕底咗嘅,我真係嚇親,比賽時冇乜講過野,但佢話我係佢學生。」張翊龍續說:「上個星期四上完第一堂之後我無再上第2堂啦,做完訪問之後佢就無搵我啦。」

《香港01》就事件曾多次聯絡譚順生,但至今亦未獲回覆。

張翊龍今次成為第二季《中國新歌聲》香港區冠軍,希望他往後可以像Celine妹妹一樣為港爭光!

 

你可能感興趣