【Gentle Women】邵珮詩從冠軍光環到被遺忘:每個人總有自己位置

撰文:程佩敏
出版:更新:

香港小姐2018明晚(26/8)舉行決賽,新一屆出爐港姐是眾望所歸,還是爆冷當選似乎也沒緊要,因為近年港姐個個拿着娛樂圈「fast pass」,主持、演戲各有發展。當然,凡事總有例外。
2014年邵珮詩(Veronica)奪「三料冠軍」當選,可惜當選後也就如過山車一樣從高處急速墜下,四年間變成網民、媒體口中的「被遺忘港姐」。
「我會每朝同自己講,今日會係一個好好嘅日子,盡量去睇多啲書、睇多啲電影、電視,或者聽多啲成功人士Ted talk,我會盡量令自己好忙,令到我唔會去諗嗰啲新聞講咩嘢或者嗰啲機會去咗邊。」邵珮詩道。
攝影:鄧倩螢
場地:四十一冰室@YHA美荷樓青年旅舍

邵珮詩試過在最高的位置,也試過不停等待工作;當選後四年過去,你還記得這位2014年的港姐冠軍嗎?(鄧倩螢攝)

剎那光輝,從來不代表永恆。

溫哥華西門菲莎大學心理系畢業,2014年參選香港小姐,一人獨攬「最上鏡小姐」、「友誼小姐」及「冠軍」三大滿貫。前任是陳凱琳,繼任是麥明詩;明明已飛上枝頭,偏偏沒令她變鳳凰。當選四年,拍過的劇一隻手數得完,最令人印象深刻的,不過是《愛.回家之開心速遞》的OL配角「欣欣」。說沒感受、沒情緒,大抵都是騙人的。

「其實選完之後,真係會覺得自己在等機會,即係幾時輪到我呢?差唔多啦! 但係⋯⋯等等下,你就會覺得好似啲機會未必咁容易落手。」邵珮詩收起燦爛的笑容,一臉認真地說。

「其實選完之後,真係會覺得自己在等機會,即係幾時輪到我呢?差唔多啦! 但係⋯⋯等等下,你就會覺得好似啲機會未必咁容易落手。」邵珮詩說。(鄧倩螢攝)

機會由「高山」掉進低谷:係會唔舒服

2014當選那年,其實邵珮詩也不是一帆風順。當年因為穿比堅尼會展現心口胎記,後被傳媒認為胸前有「異相」,大會甚至為她一改慣例,在泳裝環節增添頸飾以作遮掩,沒錯她是突破了一個心理關口,但幸運之神卻沒一直眷顧她。對邵珮詩來說, 當選港姐的風光一刻,並沒想像中的長久。

「我們作為演員,突然間有個好大的機會,好似你擔正做主持;但第二日,就好似小學生咁去問其他藝人問題,係會唔舒服,但每一次機會都係有原因先去搵你做!」邵珮詩續說:「如有位港姐得到女二,但我得唔到,明明佢係遲過我入行,咁我就會同自己講,可能那個機會換了是現在的我,未必做得咁好呢?可能我覺得自己ready,但其實我要令別人覺得我ready。」

面對無了期的等待,她唯有每日調整心態。「我會每朝同自己講,今日會係一個好好嘅日子,盡量去睇多啲書、睇多啲電影、電視,或者聽多啲成功人士Ted talk、我會盡量令自己好忙,令到我唔會去諗嗰啲新聞講咩嘢,或者嗰啲機會去咗邊?」提到由高位跌至低點的感覺,她又會自我鼓勵︰「我會覺得唔好畀自己停。雖然機會未必係好多,但你唔好畀自己停,因為一停就可能好快會沉返落去!」

+4
我會盡量令自己好忙,擺多啲嘢係個schedule入面,令到我唔會去諗嗰啲新聞講咩嘢或者嗰啲機會去咗邊。
邵珮詩

調整心態:從踩板感受「唔怕跌」態度

能夠如此坦然面對被「爬頭」的殘酷現實,可能你覺得是門面說話,但若你了解過邵珮詩的成長背景,不難發現,別人的路是行出來;而她,是跌出來。

別看她說話嬌聲嬌氣,自小受父母薰陶的她,擅長溜冰甚至曾有個奧運夢,長大後無極限運動不歡。受到韓國「長板女神」高孝周(HyoJoo)用了三年時間來籌備長板的影片的啟發下,促使她學習踩板。

「我爸爸本身係玩越野單車,細個記得成日都要去醫院見佢,但佢都繼續去玩,所以當我搵到一種運動,係感受到我爸爸好自在、好有活力嘅感覺,我就要向前行!」「跌到幾多次唔緊要,最重要係識起返身!我要練到自己唔跌,到我真係唔跌,就再試下一個再難啲嘅,只要努力總有一日可以做到,重要嘅係每次你有冇盡力去做。」從邵珮詩上載IG的踩板片段看她「不斷跌」,以至不停上演藝班抓緊機會,由被動變主動,同樣也是運動對她性格所造成的影響。

「講到那種感覺,由好高跌到好低,我會覺得唔好畀自己停。雖然機會未必係好多,但你唔好畀自己停,因為一停就可能好快會沉返落去!
邵珮詩
+1

一直不放棄:全因心底有個演戲夢?

2017年港姐冠軍雷莊𠒇,被傳因「冇job」,還未正式卸任,已決定之後離港回加拿大發展。邵珮詩的四年青春蹉跎過去,令人較有印象(其實也模糊)的作品,大抵也只有《明珠生活》、《大玩特玩》、《意外現場》等綜藝節目,還有被受批評的「雞仔聲」。

「我把聲唔係淨得係雞仔聲,我唔係!」

邵珮詩忽然換了一臉認真的「狠勁」,說着說着甚至激動流涕,大抵是因為在她心底裏,一直有份不甘心、一直有個夢。「其實我真係想做戲,我內心真係想做戲!」意想不到,至今只參演過五部電視劇,全是配角的她愈說愈激動:「我去上演戲班、做咁多電影分析,有時特登會出街去觀察一下其他人,喺地鐵睇小朋友點樣同嫲嫲爺爺傾偈呢?或者情侶係點樣去溝通嘅呢?因為我想去盡量了解呢個行業,點樣去搵自己定位。」她又希望藉其興趣向大家呈現另一面︰「點解我去玩踩板,因為我就係想畀人睇,我唔係一個淨係好開心、好feminine(女性化)嘅女仔,我個character(性格)入面係strong。跌到幾多次唔緊要,因為都是戰績嚟嘅!」

「每個港姐都要有自己性格,冇兩個女仔係一樣㗎!重要係你清唔清楚你內心想做啲咩,識唔識得點去搵到你嘅力量,當你認清方向,所有事情都會係一條直路。」「無論跌幾多次,你可以用自己方式行到那一點,唔需要跟其他人,唔需要用速度去量度自己,喺呢個世界你一定會有自己嘅位置!」

邵珮詩找到她的演戲夢,那麼你呢?

Vivetta from Cocktail Logo Tee HK$1,695/Ulla Johnson Gretchen Floral Print Silk Skirt With Ruffle Details HK$4,995(鄧倩螢攝)
跌倒幾多次唔緊要,傷痕都唔再重要,最重要係識起返身。
邵珮詩
+5
「每個港姐都要有自己性格,冇兩個女仔係一樣㗎!重要係你清唔清楚你內心想做啲咩,識唔識得點去搵到你嘅力量,當你認清方向,所有事情都會係一條直路。」邵珮詩說。(鄧倩螢攝)

Hair & Make up : Phoebe Yung
Wardrobe : Ijiit、Ulla Johnson、Vivetta from Cocktail

女生總在你身邊,請下載《香港01》App

立即下載: https://hk01.onelink.me/FraY/hk01app