同公司性格不合 不如提早分手?求職免中伏心得:見工最緊要八卦

撰文:
最後更新日期:

(《剩者為王》劇照)

每次有人辭職,其他同事就會話:「你就好啦有得走」、「羨慕你呀脫苦海」之類。大家最關心就係佢轉新工加咗幾多人工,而其實有唔少同事或讀者同我講佢係減薪走的,點解?因為同現公司「性格不合」,公司文化令佢日日唔開心,所以寧願搵少啲,所以「公司文化」都係一個幾重要嘅考慮因素。

作者:詩寧

最近,同事F辭職,原因係佢搵到份政府工,有幾個同事都表示非常羨慕:「你就好啦,以後唔使再搵工」、「嘩以後可以Hea住做啦」我恭喜同事F搵到自己鍾意嘅工作,但我無羨慕佢。首先,我識好多做政府工嘅朋友其實都好大壓力,並唔係想像中的Hea做;其次,你要我一世做同一份工,我覺得好悶,轉工有咩唔好?見多啲唔同公司嘅制度、工作方式,工同工之間又可以抖下 ……

講到尾,無一份工叫「絕世好工」,只有適唔適合。

【點圖即看】如何喺入職前知多啲間公司嘅文化,減少「拍錯拖」嘅機會?

1/ 睇公司網頁

見工前睇公司網頁當然係基本功夫,但除咗睇有咩業務、有咩生意夥伴之外,亦不妨睇下公司最近有冇舉辦員工活動?重唔重視員工聲音?

我曾經做過一份工,公司特設「二五仔熱線」,若員工於公司遇到不公平待遇時,可以匿名打去投訴。呢啲尊重員工嘅措施,係可以喺公司網頁見到嘅,雖然都係門面嘢,但公司有呢個諗法都算係Open-minded。

(《金秘書為何那樣》劇照)

2/社交媒體

每間企業都有特定形象同方針,每個Post嘅文字都包含機構特色。寫到正正經經又書面語,就知話事嗰個都係保守型;相反玩味多又會出抽水Post,似乎都願意放手畀細嘅作少少新嘗試,工作上有自由度。

(《金秘書為何那樣》劇照)

3/見工時留意公司裝修

上網睇完,打咗個底,最實際當然係實地觀察,室內設計除咗反映老闆品味之外,最重要係睇到佢重唔重視員工同埋佢希望公司個working style係點。

例如,會議室間隔係用玻璃?磨沙玻璃?定係木板或牆?全玻璃的話,好明顯老闆認為會議室內係無秘密的,唔介意開會時畀出面睇到聽到,佢性格可能Free Style啲。

而更切身當然係員工座位,有房?Open Area?一人一個位定係一張長形大枱坐埋一齊?位同位之間有無Partition?要同事坐埋一堆的,可能係想大家Work得Close啲,但亦可能係純粹慳錢,最緊要老闆房舒服,懶理出面迫埋一堆。

(《我們與惡的距離》劇照)

4/見工時周圍望下,感受下工作氛圍

由行入Reception開始,我就會睇下個接待員的面口,佢係開心輕鬆定係聽電話聽到黑口黑面?其他同事行出行入會唔會傾下偈定係陌路人咁?

有次填完表,等緊Interview嗰時聽到接待員訂緊文具,全部都係貴牌子,心諗,呢間公司放落員工嘅Budget都唔少,然後等多陣有其他人經過,接待員仲問:「今個月啲錢使唔晒呀,茶水間有無新嘢想添置呀?」

如果情況許可,行入去Interview嘅時候經過辦公室就望多幾眼,睇下大家係打仗咁款定係圍埋吹緊水,咁你就大約想像到將來入呢間公司之後嘅生活。

(《我們與惡的距離》劇照)

5/直接問Interviewer

最好嘅見工技巧,係傾偈模式,即係同個Interviewer有問有答,而唔係坐喺度好似畀佢審你咁。

但你記住,傾偈嘅目的唔係想識朋友,而係打探下公司文化適唔適合自己,所以可以問「呢個職位的Peak Season大約幾月至幾月?」如果佢答你12個月都Peak,咁你就自己諗下值唔值得喇。總之你要諗下想要一份點嘅工作?職場上有乜嘢係你唔鐘意?諗完之後你自然知道應該問Interviewer咩問題。

見工前,準備好以上各點,親身睇過、聽過,自然減低同公司「因誤會而結合」嘅機會,咁就唔使到「分手」時傷身又傷心。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。