【住無可住.來稿】我朋友借錢畀首期 $300萬買個住不了的單位

撰文:來稿
出版:更新:

早幾天在街上撞到小學同學A的老土對話
我:hello,好耐冇見!我喺facebook見到你結婚相,擺咗酒未?
A:我仔都生埋喇!
我:(展示驚訝表情)
A:你呢?
我:冇結呀,同埋唔敢生
A:唔結仲好啦,我生咗都要同老公分開住
我:吓!?點解?
A:我哋都冇樓,本來結婚之後同老公屋企人住,生咗之後屋企唔夠位,我咪同個B搬返屋企住住先
我:唔出去租?
A:萬幾蚊租邊畀得起,你好好享受二人世界啦,唔生唔結最自由

踏入29+1/-1的年紀,朋友圈子開口埋口都講結婚,不過除非屋企本身富裕,有能力支助你付首期,否則同輩根本沒能力買樓結婚。這又引申另一個問題,到底結婚是不是一定要買樓?

借錢畀首期,樓奴做足30年

組合屋何時會面世?它對劏房租金有沒有影響?

我有個好友跟男朋友拍拖兩年,開始計劃結婚,可是一想到婚後住處就頭痛,二人一度為此擱置結婚計劃。好友跟家人住在200多呎的單位,房間只放得下一張單人床和衣櫃,男友亦是與家人同住。突然有一日,好友傳了個短訊問我借5萬蚊。好友一向數還數,路還路,平時食飯差10蚊都記得要還,要借5萬元一定是緊要事。

原來她決定跟男朋友在屯門買一個353萬、300多呎的單位,9成銀行按揭,首期是47萬。好友大學畢業,投身「社畜」行列7年,多年來工資不到兩萬,加上要還「學債」,月付數千蚊家用,7年來積蓄有多少不難想像。於是,他們用了大部分積蓄,再問家人朋友共借15萬,終於完成買樓夢,供足30年,月供萬二蚊,兩口子從此省吃儉用,以前出街會買杯台式飲料行住飲,現在次次出街都自備水樽。不過計一計,搬出來租屋的價錢也差不多,自己供總好過個個月幫人供,而且婚前單位可以放租,財政壓力也不算太大。

住屋問題解決了,婚後就會搬入屯門?答案竟然是不。

事緣他們的上班地點在香港和九龍區,如果搬入屯門,通勤時間不在話下,交通費每人每日要50幾60蚊。於是他們決定婚後繼續將屯門單位放租,自己就在九龍區租屋。換句話說,他們努力儲錢買樓,市區樓價瘋癲,唯有買個不適合自己住的空間,到底我們這一代香港人要有個價錢合理的安身之所,要等到幾時?

2017年首三季租金累升6.0%,升幅顯著高於2016年同期的1.6%。(資料來源:中原地產研究部) (盧翊銘攝)

婚後住工廈有冇得諗?

施政報告提及會研究讓整幢工廈免補地價改裝為過渡性房屋。(吳鍾坤攝)

公屋輪候人數已經有27萬,但其實年輕夫婦幾乎不會有申請公屋的資格。申請公屋的二人家庭的每月最高入息限額是$17,350,就算其中一方不工作,一個年輕人工作幾年後就超過入息限額。要買到政府資助的房屋的機會又微乎其微,首個綠置居項目「景泰苑」提供857個單位,最終超額認購近18倍,而且入伙前發現多個單位的墻身及天花出現滲水情況,房委會已就物料、設施作1年保養責任期,呀,如果一年之後,滲水情況持續,還要自己負擔維修費。

我又認識另一對年近30歲的情侶,二人讀大學時認識,相戀至今第8個年頭。女方近幾年每日催婚,男方自認冇錢冇樓冇能力結婚,二人為了這個問題離離合合好多好多好多次,解決不了現實問題,精神上又深愛對方。去年二人一齊睇樓,覺得太貴,還是多等一會;今年二人又一齊睇樓,比上年還要貴,男方算是為了敷衍女友,睇樓當買樓。女方就覺得一起儲錢畀首期,兩人的問題就迎刃而解,男方無法接受一輩子當樓奴,又無法接受二人月花6000蚊蝸居劏房,每人只能享有50平方呎居住空間,畀房東濫收水費電費,要私人空間就入廁所玩電話。最近男方想通了,冇錢買樓又想要私人空間不如住工廈?幾千蚊租都有幾百呎住,女方就話工廈對女仔而言太危險,防火設施又差。

結果,二人分手了。

為了一個安身之所,有多少香港人一生要營營役役當樓奴?多少情侶因缺安身之所而分手?(梁鵬威攝)