【一司機一鬼古】凌晨運豬的貨車司機 大埔公路遇上6個截車的...
每一個夜更司機總遇上一次......
《降魔的》的馬明遇上要回家的鬼魂羅蘭姐：「我好耐都截唔到車，唔該你好心車我返去。」記者曾訪問80後六任伏英舘的林法燊（Benson），他修練成一副陰陽眼，副業助人驅鬼，他說：「鬼，都有搭車的需要。」他又說有任職的士司機的朋友，曾經載過一個乘客，「佢有畀錢，但第二日啲錢變咗冥錢。」有些意外身亡的鬼魂在路上攔截，甚至是尋替死鬼......「夜間司機撞鬼，真係唔出奇。」鬼怪之事真假難分，但讓一眾夜間司機一說無妨。
大埔公路找替死鬼的6個靈體
陳先生退休前當運輸生意差不多40年，他說90年代香港仍有不少豬場，經常需要半夜運豬，其車場位置亦設於屠房旁。「以前我哋半夜入去屠房都會覺得好陰森，連啲黑狗狂吠，但唔敢入去。」記者問：「你個鬼古係點？」陳先生有半分激動：「唔係鬼古，係真人真事。」90年代初，還未有吐露港公路，凌晨兩時他正在大埔公路上運豬至豬場。貨車有兩個大車頭燈，亮起能照通整條公路，「前面係冇車，冇人。」從前舊式貨車車頭位置可以坐六個人，「當時我五位伙記都坐我隔籬，通常佢哋上車之後就瞓覺。」當貨車剛經過和合石墳場，未及泰亨村的位置，貨車正以時速80公里在公路上行駛，「突然好近距離喺行人路上見到有5、6個人影，披住白色布攔截車。」記者問：「你肯定係人影？白色布蓋埋個頭？」陳先生：「是。當時我大喝一聲，他們立即消失了。」
他順利把豬運送至豬場，凌晨四時陳先生與一眾伙記到茶檔喝早茶，說起剛才的怪事，「我成班伙記話其實佢哋冇瞓，全部都睇到。」，記者指有六壬師傅說過，「鬼也有坐車的需要。」陳先生搖頭說不，說：「我覺得嗰6個靈體應該係想揾替死鬼，因為我哋車上剛好有6個人。」
唔驚嘅，可以睇埋呢一篇：
Benson說遇上這種情況當然要拒載，「如果咁啱6個人，又有6個鬼影，咁真係9成有啲唔妥。不過，嗰條路平時都唔多（靈體）。」他說不少意外身亡的冤魂會在路邊找「替死鬼」，令人炒車身亡後，取其魂魄投胎。
若萬一讓靈體上車，「咁咪問佢哋想去邊，點對點車佢哋去都係好事嚟嘅。冇乜大問題。如果佢要害你，唔使截停你先上車。」
泰亨村猛鬼？
陳先生深信泰亨村一向是猛鬼特地帶。陳：「我有一個行家住泰亨村，佢話成日見到啲著古裝的『人影』。家中的狗曾經向爐頭狂吠，然後兩隻後腳同時升起。」六任師傅Benson也居於泰亨村多年，自言未曾見過有穿苦裝的靈體出現，「但真係唔出奇，呢條村都幾百年歷史。」泰亨村，舊名叉坑，位於大埔北部，是文氏的聚居地。始祖是南宋丞相文天祥堂弟文天瑞，其族人大概於宋末清初遷居於香港現時泰亨村位置，現時天后廟亦於雍正年間建成。