理大學生自製方程式車追夢  隊長:愈無人做我愈要做

撰文:
最後更新日期:

全港第一隊大學生方程式車隊—「理工大學方程式車隊」,即將代表香港出戰「中國大學生電動車方程式汽車大賽」。

回首兩年的籌備過程、總隊長鄧梓聰由當初只有一人,到今天有70多人,他坦言由零到一相當不簡單,兩年間亦受盡不同人的冷言冷語,但最後都為夢想堅持,並感嘆道:「人哋話喺香港無可能發到賽車夢,我就要證明絕對有可能。」

理工大學方程式車隊花兩年時間籌備出賽,由寫計劃書、設計,同營銷技巧等都是同學一手一腳策劃。(黃永俊攝)

大學生涯只有一次,你會選擇如何去過?理工大學機械工程學系畢業生鄧梓聰(阿聰)選擇與夢想一起過。自少熱愛汽車的他,讀書的時候一直在想如何將所學習到的知識應用出來:「當時諗自己咁鍾意車,可唔可以藉畢業論文嘅機會,將夢想同學到嘅知識結合呢?」一開始的空想,終於在一次交流團中找到了實踐的方向。

理工大學方程式車隊總隊長鄧梓聰指,當初得悉內地舉辦程式大賽時,即找志同道合同學參與,惟最難反而是找老師做顧問。(黃永俊攝)

追夢路途受盡打擊

「Year 2去了一個大陸交流團,當時先知原來大陸有一個大型嘅大學生方程式汽車比賽,所以就決定一定要參賽。」阿聰說道。於是他回港後找來了8名同學幫忙,誰知難關卻接踵而來:「我哋去搵老師做顧問,但好多老師用唔同嘅藉口推,甚至有啲話你天時地理人和乜都無,唔好發夢啦無可能架。」

縱使「冷水照頭淋」,但都有人雪中送炭;工程學院顧問唐宇池回憶起阿聰來請求幫忙說:「當初佢同我講遇到好多困難,好多人潑佢冷水,甚至講啲好難聽嘅說話時,我就覺得呢啲嘢唔趁依家做幾時做,就算無可能、就算做唔到,但起碼都要一齊試下,但唔係求其整架車喎,我哋要整架成功嘅車。」

理工大學方程式車隊為學界首支車隊,下月代表香港出戰「中國大學生電動車方程式汽車大賽」。(黃永俊攝)

工程學院顧問唐宇池為阿聰恩師,協助他完成方程式賽車夢。(黃永俊攝)

幸得伯樂老師嚴厲鞭策

阿聰笑言教授對其「好嚴厲」,亦因為這份嚴厲令他們逐漸走上軌道;阿聰和幾名同學在兩年間到過德國留學,參與了當地大學車隊的營運,再將當中的經驗加入自己的車隊。副隊長陳熙榮(Henry)說:「因為個比賽唔只係一架車,仲有要寫計劃書、設計,同營銷技巧,所以我哋開始吸納自己學系以外嘅同學幫手,同埋其實香港無專係讀汽車嘅科系,技術上我哋都遇到好多困難。」9人的團隊尋求外援,就此慢慢擴展成70多人,參與的同學亦包括了工程學院、商學院和設計學院。

Herny稱,整個過程最有難度的是贊助的一環:「因為呢個係一個要好多錢嘅計劃,所以我哋搵人贊助都好難,好多公司連睇都唔會睇我哋嘅計劃書,或者直接話無興趣。」皇天總不負有心人,最終有一間碳纖維物料公司決定全數贊助物料供應,最後連同院校支援,他們總共籌集到超過100萬元,Herny感嘆道:「無諗到呢個世界真係有好心人。」

阿聰:多謝大家一起堅持

兩年的籌備經歷,令阿聰由學生到現時已畢業,但比賽下月始舉行,他表示會堅持到比賽結束才找工作:「呢兩年我得到太多太多,由零到一、由一個到70幾個,好多謝大家同我一齊堅持,一齊令夢想成真。」

他透露,車隊現時希望可以在比賽中贏得最佳新秀車隊,亦冀在5年內得到三甲的位置,將來更想到日本、德國參賽:「呢個只係我哋嘅開始,我希望車隊可以一直承傳落去,有更多人實現到呢個夢想,我自己都會朝着F1汽車工程師嘅夢想邁進。」阿聰笑道。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。