【官商換樓醜聞﹒有聲】專訪中原代理 認馮太合約無提代理違常規

最後更新日期:

馮程淑儀傍晚在政府總部乘坐座駕下班,沒有回應在場記者提問。(江智騫攝)

《香港01》調查揭發,民政事務局常任秘書長馮程淑儀,在兩年多前與賭王何鴻燊三太胞妹陳婉玉名下的公司互換物業,馮太向陳補差額650萬元,均少於市場估價及稅務局的估價。馮太丈夫馮永業約10年前身為高官時,處理航空事務上亦曾與陳婉玉交手,陳的直升機公司其後受惠。

馮太堅稱換樓由中原地產代理處理,「自己並不知悉有關單位前業主的公司股東是誰」,並向《香港01》提供了該代理的聯絡方式,着記者向該代理查詢。記者致電該名吳姓地產代理,對方只願接受電話查詢,但對於關鍵問題,包括何以交換物業合約中,完全沒有提到有地產代理,以及為何沒有臨時合約,她均沒有正面交代,但亦同意合約無提及代理是不符常規。

記者今天向中原地產公關部查詢,是否確實由該公司代理處理今次換樓交易,但暫時未獲回覆。

以下為訪問內容節錄:

記:記者 代理:吳姓中原地產代理

記:請問當初交換物業的源起?

代理:哦……咁呢啲即係,講緊一個物業放…放盤畀我哋,都可以照做。同埋即係基本上,即係都有做過,好多年前,最緊要係補返價,同埋即係佢賣同買個價,大家都OK,咁我哋咪促成佢囉。

記:物業當初是馮太找你先?過程是怎樣?

代理:咁就梗係我介紹㗎啦,如果唔係我點賺佣金呀。

記:交換物業之下,你賺的佣金同平時一樣嗎?

代理:咁做買賣不嬲都要收佣金㗎啦,冇問題㗎。

記:交易入面是否須簽臨時買賣合約(臨約)?過程怎樣?

代理:個過程……梗係要簽約啦,點解唔簽約呀?唔簽約都轉唔到啦。

記:是要先簽臨時買賣合約(臨約)再簽正式約?步驟上同一般交易一樣?

代理:咁買賣一定要簽約嘅,唔可以唔簽約啦,你你你其實係咪應該有check到㗎田土廳?check到有簽約㗎。

記:其實是否需要都有臨約呢?是否要先簽臨約再簽正式合約?

代理:Er……你如果要問呢啲呀,我唔知屬唔屬於要透露喎,私隱喎,我又唔知要唔要透露喎,即係唔好介意,好敏感喎。就算邊一個買,或者你幫我買都唔會講㗎,即係呢個牽涉客人嘅私隱,咁樣。就即係,如果你問我,係點樣介紹,咁冇問題,即係大家當傾計……但係如果你話,即係呢呢啲成交好多時其實都有㗎啦,不過就唔係好多,即係耐唔耐可以好多年先做,最主要大家,即係我介紹嘅物業,咁大家都啱嘅,咁我中間人,我賺佣之嘛,係咪先,梗係做啦。係咪呀?

為何交換物業合約沒有任何代理的資料

記:是否會在約上寫清楚你的角色?是經你做中介、佣金那些?

代理:Er……咁因為我,我哋而家同客人睇樓要簽睇樓紙㗎嘛,咁嗰度已經要披露啦,你上地產代理監管局個網都知道,要要要披露㗎嘛,我……我收幾多,咁對方都要知㗎嘛,唔可以唔講㗎嘛。

記:合約裏面有寫佣金嗎?

代理:嗰個……嗰個,睇樓紙要寫㗎嘛,譬如你同我睇樓,而家你想搵樓啦,咁我同你睇樓,咁我都要……簽張睇樓紙,睇樓紙一定要寫明㗎嘛。

記:只寫在睇樓紙就可以?

代理:如果唔寫睇樓紙我又違反操守啦。(記:咁合約係咪都要寫?)最緊要睇樓紙之嘛,冇睇樓紙就唔係一個協議嚟㗎嘛,即係你跟咗我睇,要跟我買囉。(記:睇樓紙能否查閱?)咁又唔得,因為睇樓紙係我哋公司嘅文件嚟㗎嘛,即係除非個客唔畀佣我哋,我哋用睇樓紙追之嘛。(記:田土廳內的是合約還是睇樓紙?)合約,梗係合約啦,唔係合約都做唔到成交啦。

記:所以合約未必睇到交易由你負責、佣金也未必睇到?是這個原因嗎? 

代理:Er……佢落田土廳都大部分係叫買賣合約㗎嘛,咁樣囉,個程序係咁樣。(記:我們以為兩方面認識)哦,梗係唔係啦。一個好普通嘅成交,亦都係我哋做嗰啲野全部都係跟足晒程序嘅,(笑)你又唔使咁擔心,都冇乜特別。

有律師質疑契約不可能沒有代理的資料

記:有專業人士都說過契約不可能沒有代理的資料?

代理:唔係,嗱首先我明你問乜嘢啦,即係好多成交呢,我唔知你問乜野專業人士啦,定係律師啦,咁總之有冇註上田土廳呢係depends on個律師有冇註上去既,如果你話你睇到嘅,佢註咗啲乜野呢?就係律師註上去嘅,就唔係我哋註上去㗎嘛,係咪先?

記:我們就是因為看不到有代理的資料,才來查詢的。

代理:咁但係你話,你只係見到咁多,咁呢個係普通平常一個買賣,咁就算你話……有啲成交咗之後都唔會註個按揭契上去住嘅,我都見到有。我諗係,唔係常規嘅做法囉……maybe,或者,但係你話就咁係講點解冇、點解冇?咁即係,我會覺得就係,要註上去嘅,咁註咗上去你睇到,係呢個咁樣買賣嘅成交之嘛,我都唔明點解你哋係都要問(笑)一啲野。

記:我們就係觀察到你有一個說法、律師又有另一說法。

代理:嗱唔係我講法,而係一般有啲程序嘅做法,唔通我質疑個律師,喂……喂你點解註個啲唔註嗰啲咁樣?人哋讀咁多書個法律意見仲勁過我啦吓話。

記:合約中沒有代理資料,常見嗎?

代理:首先律師點樣註個啲野呢,就真係律師樓,佢哋……律師會清楚點樣做……去註㗎嘛,我都話囉,註上田土應呢一part唔係我做㗎嘛,我淨係去撮成一個交易㗎咋嘛,係咪先。

記:即係有你在當中的?

代理:你……你應該……反而我比少少建議你呀,你問一啲律師樓,一單買賣邊d野會註上去、邊d野唔註上去,同埋點解我要check嘅嘢我check唔到呢?反而我覺得你不如問你哋比較熟d嘅律師。(記:律師正是說不會沒有代理資料)你問多幾個律師啦,所以我咪話你問一啲做物業嘅律師囉,你問一啲做開物業既律師啦,有啲律師係冇做開物業嘅呢可能佢都未必答到你。

記:但我們都有問過經紀行?

代理:你問經紀行?求先都話問律師囉,你又問返經紀行,咁你問我都啱嘅,咁我撮成㗎嘛,咁你問第二啲,咁當中佢梗係唔知道我點樣傾,我亦都冇必要同行家傾我傾緊d咩,吓話。我冇理由傾緊單野,我話畀行家聽㗎嘛係咪先,你……你問行家嘅,咁行家又唔係……唔係律師,掉返轉你問我我又唔係律師,問題你話點樣註點樣盛,我諗你係直程問做開樓嘅律師問啦,點解嗰啲註上去、個啲唔註上去,我諗你clarify返呢個問題先?



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。