【李嘉誠退休】誠哥版「施政報告記者會」金句　教你點揀老婆

長和系今日（16日）發表業績，集團主席李嘉誠一如以往在記者會上「大派金句」，隻言片語都足以引起社會關注。除了談到自己公司、香港政治環境，李嘉誠亦罕有提醒青年擇偶時要注意的事項。一問一答，李嘉誠退休記者會金句不少，你又認同幾多？

訓勉年輕人

如果有年輕人，大學未畢業嘅，女朋友同佢講：「你如果無樓，我唔同你結婚。」 我係男嘅，會講：「你（女友）趁後生，搵個第二個！」 呢個係不正常。

我12歲來到香港就要做嘢，未夠14歲佢（爸爸）就過咗身，當時都係近於貧。 你自己肯做，一樣都係，樣樣嘢係正路。 無一個penny（便士）係唔應該賺嘅，賺出來。

樓市過去兩年，高咗一倍錢，樓價和一般市民收入，脫咗節。政府要起多啲公屋、多啲居屋。

力撐公司歷年發展

經濟知識都無嘅，先會講走資。我呢頭賣嘢，呢頭就去投資。 講走資，我只能置之一笑，連一般知識都冇！

世界唔係太多公司有5,000倍回報。

我講真話，會得罪好多朋友；但我講假話點解要出？我又唔想講假話。

與中央關係

如果我有資格投票（修憲），等習主席連任多期嘅，我會一樣投畀佢

幾好喎，講晒！ 我個人呢，絕對唔會講啲唔應該講嘅說話。

佢（李澤楷）自己係北京政協，個職位係佢自己，真係忙到無去開會，好少去開會。呢個係事實，但係絕對唔係佢唔愛國家，佢都係好愛國家嘅人。絕對唔係人家所諗嘅嘢。

支持一地兩檢、林鄭月娥

一地兩檢， 咁着數嘅嘢，絕對絕對係啱嘅事。有一國，然後有兩制。

我一定會坐高鐵去汕頭！

政治嘅嘢，多數都要compromise（妥協），都要融合。大家要折衷，要合理。

我認為林太做得好好，盡心盡力為香港做事。批評容易，做就好困難。 我感覺佢全心做好，相信佢工作時間，比你同我都長。