【離地6米】太子唐樓樓底太高無法驗滲水 區議員斥滲水辦:荒謬

撰文:李穎霖
出版:更新:

大廈出現滲水,隨時影響樓宇結構,造成危險。太子一幢唐樓樓底早前被發現出現滲水,但滲水辨竟指該位置太高,無法檢驗。有區議員直斥滲水辦荒謬:「係唔係離地6米就冇佢『符弗』?」

太子道西一幢唐樓約一年前被發現露台底部石屎橫樑有裂痕,由於該位置為繁忙通道,平時有不少人行過,故街坊擔心會造成危險:「街坊有打過1823投訴,但冇人理,於是我哋提交咗文件,要求部門跟進。」油尖旺區區議員黃舒明指,屋宇署當時調查後,發現該處為「3無大廈」,難以發出修葺令要求業主跟進,故先派人把樓底容易鬆脫的石屎鑿走,以防石屎剥落,擊中途人。

太子道西一幢唐樓樓底繼被發現有裂痕後,又被指滲水,故街坊擔心會造成危險。(油尖旺區區議員黃舒明提供)

處理好石屎鬆脫問題後,有街坊發現該處有漏水問題,擔心滲水會影響到大廈結構,故要求滲水辦跟進,惟滲水辦指「做唔到」。「滲水辨話因為個樓底離地6米高,所以冇辦法核實滲水源頭。」黃舒明引述滲水辨回覆指,滲水辨未有發現滴水問題,而該樓底位置亦因太高而無法靠近、進行濕度測試,故停止處理該個案。滲水辨又補充,如有人可提供滲水源頭,他們方可處理問題。

滲水辦指樓底離地太高,故無法進行測驗。(油尖旺區區議員黃舒明提供)

面對滲水辨的回覆,黃舒明直斥荒謬:「咁係唔係離地6米就冇佢符?你有唔同工具同升降板去做呢啲測試架嘛。」她指雖然滲水辨一直以色粉測試滲水源頭,但知道他們亦有紅外線槍,認為用這工具亦有助部門測驗濕度。

滲水辨於日前在交通運輸及房屋事務委員會上,就問題提交書面回覆,惟黃舒明指部門只強調「離地6米」的問題,而在席的屋宇署職員亦只就滲水、樓宇結構等定義作出回應,對議員的追問「問極唔答」:「席上所有議員都覺得佢哋『hea』答,係唔係要等冧樓死人,佢哋先去搞?」

黃舒明斥部門「踢一踢,郁一郁」,每每要街坊和議員投訴,才有所行動,而滲水辨和屋宇署的回覆亦令人失望,已要求屋宇署和食環署一同出席下次會議,就事件作出跟進:「如果佢再問非所答,我哋會寫信畀署長。」