【天文台科普】屋企唔覺凍出街先中伏 室溫變化快慢全因石屎牆?

最後更新日期:

(原文取自天文台網頁,大小標題、引言及內文,經過香港01編輯修訂)

某個冷鋒過境的早上,天氣預報員和家人就該穿多少衣服討論了一番。

預報員家人:收音機話今朝各區氣溫普遍比尋日低幾度,跌到13、14度。但屋企跌溫(瞄一瞄溫度計)連兩度都唔夠,等我尋晚仲幫阿仔加咗好多衫、又加厚啲被瞓覺,焗親佢添!

預報員:其實冷鋒啱啱先過境,石屎建築物溫度反應比較慢,初時牆壁嘅深層仍然保存之前吸收嘅熱能,慢慢釋放出嚟,所以屋企通常會滯後一兩日先明顯跌溫。

(資料圖片)

出門後

預報員家人:嘩!剛才帶阿仔返幼稚園,喺出面凍死我哋喇,我見有啲街坊甚至着羽絨外套添!

預報員:今日外面好大風,容易帶走身體嘅熱量,再加上多雲同有雨,由於水嘅導熱能力比空氣高,落雨時喺身體附近嘅水點較容易令人體熱量向外流失,所以感覺特別冷。

預報員家人:你又唔喺我出門口前講?早知幫阿仔着多啲衫返學啦!

預報員:……

數天後室外氣溫回升

預報員家人:你又話氣溫開始回升,點解今朝起身屋企仲係涼浸浸?

預報員:道理很簡單,記唔記得幾日前講過…

預報員家人:知啦知啦,又係同石屎有關嘛!

預報員:低溫持續咗幾日,牆壁嘅餘熱已經消耗。而石屎建築物除咗散熱慢,吸熱亦較慢,視乎屋企坐向、通風情況、日照多少同室外溫度上升速度,屋企升溫通常會比室外滯後一兩日,所以我哋喺室內仲會感到陣陣寒氣。千祈唔可以掉以輕心,要確保阿仔喺屋企着夠衫保暖呀!

預報員家人:原來係咁。我都要打電話提提六嬸,佢行動不便,好多時間都留喺室內,一定要着夠衫。

預報員:老人家身體熱能容易流失,最凍嗰日未必係最危險。由於發病情況有滯後現象,所以就算氣溫略有回升,我哋都要關心老人家嘅身體情況呀!

原文:着衫大作戰

作者:香港天文台蔡瑞聰、郝孟騫



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。