【逃犯條例】遭私了男子現身「人間記者會」:因出手扯戴面罩青年

撰文:
最後更新日期:

反對修訂《逃犯條例》風波持續,一邊廂有反修例網民定期就各議題舉行「民間記者會」,另一邊廂今日(9日)則有建制人士舉辦「人間記者會」,斥示威者的破壞行為,聲稱「人哋唔報我哋報」。

記者會上,首有被「私了」傷者現身。他9月中到九龍灣淘大商場參加唱國歌活動,在馬路上扯下一名「囂張青年」的面罩,結果被「護法」打傷頭,傷口已癒合。「邊啲人會戴住頭罩?以我記憶,80年代啲人打刧金舖先會戴住頭罩。」

發起人之一的菁英會副秘書長、「護旗手」高松傑表示,在反修例風波初期已被「起底」,並指每日都有人以其個人資料預訂酒店、購物,甚至「被捐精」,並指「𠵱家已驚咗收email」。

記者會分為「一周大事回顧」、「一周破壞清單」及「私了個案」等環節。另一發起人、外號「大波Man」、曾任警員的石房有認為,「民間記者會」中的人士均戴上口罩,希望人間記者會可令不同聲音的人士走出來發表意見。

高松傑對昨日(8日)科大學生周梓樂離世感遺憾,「呢啲事件一宗都嫌多。」他又稱,在閉路電視中可見警方與周同學在停車場中未有接觸,希望市民勿相信謠言,若有質疑應提出證據。記者會上又列出過往被破壞商舖,包括不同中資銀行等。

發起人:「暴徒」專打受害者頭部

石房有指出,每逢星期五、六及日,不同地區都發生私了事件。他表示,有不同政見人士經過示威區,被「暴徒」用傘、鐵枝、任何攻擊性武器、拳頭、磚,甚至大殺傷力武器如丫叉等擊;他指「暴徒」主要集中攻擊受害者頭部,「大家睇片都知,專打頭,你有冇見到每個人頭部都流晒血?」

↓↓反修例示威中一些被私了個案↓↓

+13
+12
+11

「大波Man」石房有透露,女兒曾在學校門外被人淋湯渣等,批評屬襲擊及暴力行為。

他舉例部分「私了」個案:

內地學生在尖沙咀栢麗大道說國語(普通話)而被私了,「因為佢係中國人、內地人,因為言語上支持祖國,就俾人私了、就俾人噴黑塊面。」

一名前香港足球隊龍門,在元朗說了句「警察加油」,「就(被人)兜口兜面噴油,我睇到呢件事好嬲。一個足球員講句咁就說話,就喺元朗俾人私了,除咗打頭外,仲要打佢隻腳,對足球員係好重要位置。大家可以理性溝通,但去到嚴重用暴力程度,正常人都唔會容許。」

旺角一名男子被打到完全倒地、無還擊之力,還要被人除去底褲,露出下體,「一個正常人、有理性嘅人,或者全世界睇到呢類案件,正常人一定會覺得好憤怒,因為暴力不特止,仲係要侮辱。」

尹先生9月中前往淘大商場參加唱國歌集會途中,扯下一名示威者頭套後遭「私了」打傷,左額頭留有疤痕。(香港01記者攝)

會上邀請曾被「私了」的尹先生出席。他在9月14日到淘大參加唱國歌聚會,「行到去商場對開馬路,見到個蒙住面、好囂張(的人),喺到叫囂、指罵我哋。我想問大家,可唔可以咁樣?蒙住塊面喎,無乜責任喎!當時嗰一刻我就忍唔住,我就衝過去將佢頭罩除低,跟住嗰啲所謂『護法』,個個衝埋嚟打我一個人,嗰一刻就自己保護自己啦。」

當日有電視拍攝到成個過程,大致與尹所言相付,是他首先出手揭開青年面罩。他就是否先行「私了」回應記者說:「我啲行為係咪好暴力?我承認我係你(記者)提嘅所謂『私了』,我唔做(扯下面罩),(青年)係咪繼續可以囂張、唔需要制衡?」

尹先生當日欲教訓戴面罩青年,結果遭私了,左額頭爆缸,血流披面。(資料圖片/李澤彤攝)

我就係睇咗幾個月,啲人戴咗頭套咁囂張,香港出世咁多年,從來冇見過啲人咁囂張。啲人戴住頭套做咩都得,你除佢頭套,睇佢咩反應?
被私了的尹先生

對引致私了不言悔:我都覺得係啱

對於受到皮之苦,又留下疤痕,尹先生不言悔,「問我之後感受,我都覺得係啱。啲人戴住頭罩,乜都夠膽做,完全冇責任。一戴住個口罩,滿口仁義道德、民主自由,呢啲邊啲國家教佢㗎?邊啲人會戴住頭罩?以我記憶,80年代啲人打刧金舖先會戴住頭罩。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。