【新冠肺炎】自由表演者無show開 做裝修、收銀等維生:只係死捱

撰文:黃詠榆
出版:更新:

新型冠狀病毒肺炎(俗稱「武漢肺炎」)疫情持續,自1月下旬,學校停課、康文署封館,藝術工作者收入大受影響。自由表演藝術工作者文仔便是其中一人,嘗試透過打散工:做收銀員、裝修、幫小巴消毒等,維持生計。
局方近日推出7,500元單次援助金,由於不包括戲劇班導師,以致文仔不符資格申請。他直斥政府回應「求其」,不少從業員現在只是死捱。香港舞台藝術從業員工會籌委胡俊謙形容,現時行業如同進入停擺狀態,「但支援完全唔夠,藝術教育更係一蚊都無」,期望政府更宏觀地支援行業。

「停課、康文署封館 我哋無晒工作」

自由表演藝術工作者文仔一向擔任演員、司儀、戲劇班導師等工作,上年年尾受社會運動影響,演出已開始減少,「但疫情一講停課,康文署封館,我係100%冇晒(演藝工作)。」文仔由12月尾至今,已做過3份散工,「分別喺手調飲品舖做收銀、裝修、幫小巴噴消毒噴霧。」以往月收入約2萬元的他,現跌至僅7,000元,只可節衣縮食度日,減少坐的士、有時吃麵包,「其實我好憎食麵包,但依家有時真係要買嚟食,盡慳」。

受疫情影響,文仔接不到任何演藝工作,靠打散工維生,收入亦由2萬元跌至7,000元。(歐嘉樂攝)
「演藝界搵食嘅場地其實就係表演場地同學校,依家根本係無地方比我哋搵食,所有嘢都停晒,可以話係寒冬」。
自由表演藝術工作者 文仔

政府津貼未能協助自由身工作者

文仔個案只屬冰山一角,他自言算幸運,起碼「仲有工開」。政府近日針對自由身工作者,推出7,500元單次援助金,惟文仔卻不符資格申請。文仔形容,津貼諸多條件,「基本上學校巡迴、演戲、教學,大家最主要做嘅三樣嘢都係唔接受」,認為津貼只幫到「業餘」工作者。

他認為,政府宣佈封館、停課,有責任作出相應賠償,「其實藝發局要知道,我哋都係好愛呢行,但喺呢件事情睇到,藝發局就唔係好愛我哋呢班藝術家」,直斥局方回應「求其」。被問到情況持續,會否萌生捨棄舞台的念頭,他表明有掙扎念頭,無奈道:「我哋呢班從業員只係死捱,我哋熱愛呢行唔會唔做,但係會死捱」。

「如果持續……我哋呢班從業員只係死捱,我哋熱愛呢行唔會唔做,但係會死捱。」
自由表演藝術工作者 文仔
香港舞台藝術從業員工會早前進行了一項調查,5成從業員在2月至4月損失15,000元。(歐嘉樂攝)

5成舞台藝術從業員損失1.5萬元

香港舞台藝術從業員工會籌委葉興華說,工會早前進行了一項調查,5成從業員在2月至4月損失15,000元,形容政府的7,500元津貼「少得交關」。

香港舞台藝術從業員工會籌委胡俊謙亦表示,行內有8成以上工作者是自由工作者,主要收入來自教育方面。胡認為,學校停課、康文署停館,直接令行業進入停擺狀態,「但支援完全唔夠,藝術教育更係一蚊都無」。胡認為,政府應宏觀地支援行業,「人才流失咗,係錢都補唔返,啲人已經轉咗行,倒閉咗就開唔返。」

香港舞台藝術從業員工會籌委胡俊謙(左)、香港舞台藝術從業員工會籌委葉興華(右)。(歐嘉樂攝)
「人才流失咗,係錢都補唔返,啲人已經轉咗行,佢倒閉咗就開唔返。」
香港舞台藝術從業員工會籌委 胡俊謙