【港人菲國製毒案】父親哥哥犯案繫獄 被囚港人女兒孤寡過年

撰文:
最後更新日期:

港人菲國製毒案發生至今已近半年,四名港人家屬多月來為事件奔波勞碌,希望家人可以儘快獲釋回家,然而曙光未露,卻又傳出四人將要轉移重犯監獄的消息,明日將踏入新年,四人家屬團圓無期。其中一人梁樹福的17歲女兒琳琳半年來失去爸爸的依靠,面對將要應考文憑試亦感到吃力,「有時會諗如果佢喺度,會唔會咁難挨咁大壓力」,即將踏入新一年,女兒未怕遙遙長路多斜,只願能倚於爸爸的肩膊。

父親被囚近半年,琳琳每天都為著父親案件及將要應考的中六文憑試而吃力。(魯嘉裕攝)

受訪時琳琳正替姨母的飾品店看守,即使為著父親案件及將要應考中六文憑試而吃力,17歲女生仍然堅強過活。父母多年前離異後,琳琳一直與母親同住,但她與爸爸的感情卻十分要好:「唔夠錢用會搵爸爸、同媽媽哥哥爭執會搵爸爸,每逢有困難爸爸都一定幫我解決。爸爸都好錫我,教我好多做人道理,如果無佢我唔會有依家咁生性,所以由佢出事到依家我都唔相信佢會犯呢啲事」。

出事至今,琳琳堅信父親梁樹福(白衣)為無辜。(菲律賓警方圖片)

從前不節儉 現半工讀賺補習費

父親被囚近半年,琳琳頓失依靠,「呢半年好難挨,每當一個人靜落嚟就會諗起佢,讀書壓力想同佢傾,佢又唔係度,有時會諗如果佢喺度,DSE會唔會咁難挨咁大壓力」。琳琳稱自己以前不太節儉,但爸爸出事後,她於假期會做兼職賺取補習費,「以前會問爸爸攞錢,依家自己會搵外快,希望自己賺番自己啲生活費」。

父親哥哥俱分離 一人出席年夜飯

琳琳22歲的哥哥於去年4月因攜帶咳藥水而被安排到石鼓洲康復院接受輔導,未幾爸爸又被捲入菲國毒品案,歸家無期,「哥哥唔生性,以往爸爸定時去探佢,但依家就無咗,哥哥都好唔開心」。琳琳說,過往新年時3人都會齊齊整整,到嫲嫲家吃團年飯,然而今晚年三十的團年飯,只剩琳琳一人出席,孤獨過年。琳琳指猶幸有大伯及姑母們協助爸爸,她唯一的新年願望,是希望爸爸能早日平安歸來,「希望以後有咩難關都可以有佢係身邊,就算今年唔可以一齊慶祝新年,都希望佢喺嗰邊身體健康」。

菲國一直拖延 堂費如無底深潭

另一名被捕港人盧榮輝的大哥,同樣為弟弟的官非感到憂心,又指現時不知道如何尋求協助,感到束手無策。他指弟弟與前妻育有一個13歲女兒,其女兒亦因父親的案件而情緒低落,剛剛與她們吃完團年飯,「年年都一齊食飯,咁一家人梗係要安慰佢哋(盧妻女),點估到今年會少咗個細佬喺身邊」。

「當年英國政府做到嘅嘢,無理由中國政府做唔到。」
盧榮輝家屬盧先生

盧先生指案件至今毫無進展,猶如無底深潭。(魯嘉裕攝)

盧先生又指菲國一直拖延案件,令家屬十分焦急,「突然話要調監獄,審訊又一直拖,又話證人唔到,又話證物未得,依家已經畀左十幾萬律師費,但咩進展都無,好似無底深潭咁」,盧又提到於1991年一名港人領隊區永祥及另一名港人,於菲被指販毒遭判終身監禁一事,當時立法局議員和時任港督彭定康出手襄助,結果區永祥兩人於1996年獲釋放回港,「當年英國政府做到嘅嘢,無理由中國政府做唔到,希望佢哋關注吓」。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。