夾公仔舖偷Labubu|13隻連毀機損失逾$1萬 台主:以為清台咁犀利
深水埗一間夾公仔舖今日(4日)凌晨遇竊,3賊全副功架夾公仔敗北,把心一橫毀機伸手偷走Labubu公仔,初七人日「滿載而歸」。其中一名「台主」周先生向《香港01》透露,起初以為有人「咁犀利可以清台」,結果翻查閉路電視,才發現被人「清倉」。他又指,其機台被偷走6隻公仔、毗鄰另一機台被盜7隻公仔,連同被破壞的夾公仔機,相信總損失逾1萬元。日後或會在出獎洞口改裝鐵板,減低被毀風險。
周先生表示,今早7時許揭發案件,翻查天眼後,發現3名賊人最初「好正常咁樣夾」,其後玩得興起,「開始玩搖機、推機嗰啲動作,後來其中一人在左邊的夾公仔機「用力壓,壓鬼爛咗嗰塊板,跟住就直接伸手攞(公仔)喇。」
中途賊人一度離開店舖,之後折返在同一部夾公仔機偷走全部公仔;其中一人隨後再食髓知味,由最接近門口、屬於周先生的夾公仔機,破壞出獎擋板,偷走4隻和2隻公仔。周先生笑言,賊人以為自己已變裝,「戴咗口罩、除咗件外套,但其實條褲、對鞋同埋頂帽都仲係佢嚟嘅」。
周先生的夾公仔機內,每隻公仔平均價值約375元,故被偷走的6隻公仔共值約2,250元。至於另一部遇竊的夾公仔機屬另一台主所有,亦慘被偷走7隻公仔,據知每隻平均價值約350元,即損失約2,450元;而夾公仔機被破壞,損失約6,000多元。
周先生指,過往亦曾有人企圖由夾公仔機盜竊,曾遇過有人用鐵線、鐵尺等,嘗試「撩」出公仔,他於是在機台內「封咗啲膠邊,等人哋啲鐵線、尺攝唔到入去,又喺出口位加咗頂住硬位嘅鐵,令到佢唔可以直接掀起」。
今次是他首次遇到有人直接打爆擋板偷取公仔,他無奈道:「就算有人撩貨,我哋都認係自己防禦做得唔好,畀人哋撩到,都認自己衰吖,但係估唔到有人寧願搏刑毀去做呢樣嘢(盜竊)。」他之後會考慮將出獎口的膠檔板,換成較更的鐵板,以免再被人打爆。
對於涉案賊人起初曾入錢夾公仔,周先生表示,他以台主角度看,認為玩家入錢後若「覺得你自己打唔到,或者覺得好伏,我哋自己都會放棄」;又指很多人以為夾公仔機有「保夾」設置,會不斷付款試夾,但他稱香港的夾公仔機其實並無「保夾」。
現場為深水埗福榮街與石硤尾街交界一間夾公仔舖,今日凌晨4時許遇竊,夾公仔舖閉路電視片段顯示,一行3名男女起初正常付款夾公仔,惟未能成功夾出公仔,其後有人多次由夾公仔機的出獎洞口伸手入機,偷走共13隻公仔後逃去。
警方於今早9時許,接獲該間夾公仔舖的30歲男負責人報案,指有閉路電視拍得3名疑犯到店夾公仔,其後破壞夾公仔機偷去多隻公仔。案件列作盜竊,交由深水埗警區刑事調查隊第六隊跟進,正追緝賊人。
天眼直擊|3賊深水埗唱$240夾公仔無果 毀擋板伸手偷13隻Labubu