【中秋月餅】天鴿摧殘後　澳門月餅老店特別設計抗山竹見成果？

一年容易又中秋，但對於澳門十月初五街月餅老店品芳餅家來說，這年可謂並不容易，去年中秋前經歷天鴿風災，嚴重水浸將地舖木櫃及設備浸毀，光是清理及重購器具就花近20多日才復業。老闆陳生曾一度打算結業，最後決定咬緊牙關花數十萬翻新店舖，希望重新上路。
經過一年，餅家又再迎接中秋高峰期，換上煥然一新的面貌，一切重上軌道之際，上周又迎來颱風山竹的吹襲。然而今次餅家已早有準備，陳生指店舖換上新裝並非「貪靚」，而是因應屢次水浸而特別設計，「最重要衛生、企理乾淨，客人食都有啲信心」。

多次風災　不斷借貸翻新

去年颱風天鴿襲澳，十月初五街成為其中一個水浸重災區，商戶損失慘重，其中包括80年老店品芳餅家，洪水衝入店舖浸毀月餅、焗爐及電器，店內頓成一片廢墟，光是執拾垃圾及清理泥濘已花超過兩星期，「雪櫃都掉咗四個」。事後陳生決心整頓店舖，向政府借貸30萬免息貸款，為店舖進行大翻新。品芳餅家於2008年已經歷過黑格比風災水浸，當時亦有向政府借貸，陳生指剛於天鴿來襲前才還清債務，不料債台再築，「借完又還還完又借，有排幫佢做」。

改頭換面熟客「唔認得」　推新口味咖啡月餅

店舖主色由白色變為棕色，被浸毀的木餅櫃現改以水泥及雲石建造，即使水浸亦容易清洗，牆壁重新批盪，門外加裝1.7米高的水閘，部分電器及電錶升至近兩米高，再掛上新招牌及商標，陳生指有客人直言「唔認得」，「做食品最緊要品質同衛生，唔係貪靚，屋企就貪靚，要畀客人整潔嘅印象」。除了新形象，餅家今年亦推出新式產品包括咖啡及果皮豆沙月餅，又與香港一間鮑魚店合作推出月餅，「佢哋覺得我哋品質好，咪同我地攞貨」。陳生指感覺今年中秋生意與過往相約，沒有刻意計算「除非你唔做，做啲人就會返嚟買」。

預早準備今年再被浸　「已比舊年好」

今年中秋前夕正值颱風山竹來襲，汲取過天鴿教訓，陳生今年於山竹來襲前已盡早將訂單完成，不會留下太多存貨，另外又於前一日已將物品搬上閣樓，務求將損失減到最低，但部分大型電器如雪櫃及焗爐等則無法搬走，「搬得郁就搬，搬到就係你嘅，搬唔到就佢嘅」。

老店獲政府扶助　惟望盡快建堤防洪

受天鴿重創後，有商戶指十月初五街人流減少，生意亦大受影響，部分商戶更因而結業離場。陳生指政府於災後有出手協助受災商戶，包括資助部分店舖安裝水閘，又由不同渠道推廣旅遊業促進人流，包括去年開始於十月初五街舉辦「康公夜市」，另外最近政府推出特色老店扶持計劃，餅家入選獲資助重新設計及更換產品包裝，「有佢帶吓叫做好啲」，但亦認為政府亦早日興建堤壩預防再發生水浸，「政府做嘢慢，佢做快啲我哋就安落啲」。

山竹來臨當日，十月初五街再一次成水浸災區，餅家即使已加裝水閘仍難敵洪水，今次水深為1.5米，陳生估計洪水由兩旁牆壁滲入，兩個焗爐被浸及，但因早作準備將店舖物品清空，店員用水喉清洗店舖時仍比去年方便，惟仍因水浸後停電需要停工一日，陳生認為「已經比舊年好」，又指「錢搵唔哂嘅，做生意都係想搵錢啫」。