【新冠肺炎】沙田好運中心淪「死場」現結業潮 撈麵店生意跌九成

最後更新日期:

新型冠狀病毒肺炎(俗稱武漢肺炎)疫情肆虐,食肆生意大受打擊。《香港01》記者於沙田好運中心視察,商場內近七成為吉舖。屹立好運中心21年的一間撈麵店,女店員指近月生意大跌近九成,隨時面臨結業危機。沙田好運中心內衣店東主表示,近月生意如「斷崖式下落」,業主拒絕減租,商戶百上加斤只好結業,「我都唔知自己捱到幾耐!」

個個唔岀街,今次應該好多人(商戶)執笠,我都唔知自己捱到幾耐。
胡小姐 沙田好運中心內衣店東主

《香港01》記者於沙田好運中心視察,商場內近七成為吉舖。(鄧詠中攝)

撈麵店女店員指,過去不少人到撈麵店買小食「醫肚」,惟近月停工及停課,撈麵店幾乎無人光顧,生意大受打擊,營業額大跌近九成。「沙士都無咁嚴重,當年有人嚟行吓街,今次(新冠肺炎)真係無咩人出街!」

「以前成個商場冇乜吉舖!」眼見附近的商戶不敵疫情來襲,於收入不足情況下紛紛結業,她指多間租戶曾多次要求業主減租,惟業主拒絕下調租金,「反映咗好耐,寫信都寫咗好多次,個個都做到心灰意冷。」女店員指如果生意繼續受創,擔心面臨結業危機。

撈麵店顧客:近月減少光顧、轉購外賣回家

「幾個月冇嚟,岀街都少咗!」撈麵店顧客楊小姐表示,疫情前經常與兒子光顧撈麵店,近月亦減少光顧,以及轉買外賣回家吃。楊小姐稱商場出現大量吉舖,她坦言明白小商戶困境。「業主唔肯減租,一日都開唔到單,要交租同畀人工,畀著我都摺(結業),遲早成個商場都係吉舖。」

經營內衣店的胡小姐指,今次疫情令市道慘淡,業主拒絕減租令商戶百上加斤。(鄧詠中攝)

內衣店東主:市況如「斷崖式下落」

「以前都有啲人行吓街,最近無咩人出街,我都係純粹做熟客。」於好運中心經營內衣店近30年的胡小姐指,今次疫情令市道慘淡,加上去年反修例事件少人出街,港人消費力減弱,她形容市況如「斷崖式下落」。胡表示,業主拒絕減租令商戶百上加斤,其店將於今年12月完約,擔心收入不足會提早結業,「個個唔岀街,今次應該好多人執笠,我都唔知自己捱到幾耐。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。