紅磡民裕街一間藥房的「貓店長」樂樂上周六（16日）疑被人抱走失蹤，引起關注，幸今早（22日）終失而復得，老闆接受電話訪問時，心痛稱：「殘咗呀，肚都凹晒！」《香港01》晚上再到藥房探訪，黃老闆再親述樂樂回家經過，又指全日有街坊探望，惟樂樂垂頭喪氣，「成個落晒形‥‥‥唔食嘢，要用針筒餵佢囉。」

黃老闆稱，今早9時許，一名熱心男街坊在附近一工廈對開魚池，發現樂樂蹤影，立即將其抱回藥房，人貓重逢，老闆非常感謝熱心市民的協助，「成個紅磡刮緊佢（樂樂）！」

樂樂回家後，全日都有街坊慕名探望，「全日都有人嚟探佢同佢玩！」但現場可見，樂樂垂頭喪氣，情況一般。黃老闆稱：「瘦咗啦，成個落晒形冇乜心機，成個都僵硬晒，只飲少少加咗葡萄糖嘅水‥‥‥唔食嘢，要用針筒餵佢囉。」黃老闆指，明日會再視乎情況要否帶樂樂求醫。

黃老闆續指，樂樂由其兒子夫婦買回來，放於舖頭飼養13、14年，平時牠會走出去附近遊玩，但不會走太遠，亦會自己回家，「懷疑係有人捉咗佢幾日，見到佢殘殘哋，咪放返出嚟。」