屯門雅都花園停水|第三座斷水第4日 居民訴苦天冷要煲水沖涼
屯門雅都花園第三座自本周二(11月17日)起疑因食水管爆裂緊急停水,目前3樓至15樓仍然未有食水供應,居民被迫到垃圾房附近取水,既不方便,衛生環境亦欠理想。《香港01》記者今日(20日)早上到場了解,有趕返工的居民,冒冷風落樓取水應急。
現場有通告標明商場冷氣喉及第三座食水管的損毀情況,兩處均有斷裂位置,部份殘骸懸於半空,惟未有解釋實際爆裂成因。有居民聞悉,是較早前商場冷氣喉損壞墮下,壓爛食水管。
住戶湯先生稱,今日踏入停水第四天,已經購入樽裝水回家使用,連日來亦要外出用膳,並在親友家中借用浴室沖涼。
居住三座14樓的曾女士早上到來取水,她大吐苦水:「邊有水呀!噚晚開又冇,今朝開又冇。」令生活極為不便。她與丈夫二人沒有煮食,過去兩餐均外出用膳,每日落樓取水:「夜晚唔使沖涼唔使食飯呀?我煮飯都冇煮兩餐,出街食咋!」大廈升降機張貼告示指15樓以上已恢復供水。今日氣溫明顯下降,家中縱有熱水爐,但因無自來水供應根本無法使用,只能「用煲水啲水沖(涼)」。至於何時能恢復供水,亦毫無頭緒:「點知呀?鬼知管理處幾時整返好!」
另有住戶補充,事發當日(17日)早上返學時間突然停水,初時全座大廈無水,翌日(18日)15樓以上樓層陸續恢復供水,但15樓以下至今仍未有恢復時間。
該住戶透露,管理處通告指已完成招標,工程今日(20日)正式開工,惟預計維修需時,暫未知何時完工,「而家等佢緊急維修,睇佢幾時緊急完!」停水期間只能輪流到朋友家中或鄰近的體育館洗澡應急。
+3