情人節│嘆疫下朋友間失關懷　買花人夫陸生：情人節屬於成個世界

第五波疫情大爆發，市道慘淡，情人節氣氛大不如前，人夫陸先生今早到太子花墟買紅玫瑰送給太太，他稱疫情下「更加要做多啲嘢」，除了情人，亦關懷朋友、親人，「其實情人節唔係屬於情人咁簡單，我覺得係屬於成個世界、成個香港。」

陸先生與妻子相伴17年，他說由拍拖時每年情人節都會送花，今年花價便宜很多，「呢紥平咗200蚊」，但他聽說由於外國運送本港人手不足，運輸成本大幅上漲，荷蘭等地到港的鮮花加價200多元，內地到港可能較便宜。他稱買花的預算「睇老婆頭，因為我啲錢喺晒老婆度，買咁貴又唔鍾意，所以我要買啲性價比高嘅，本來我嘅budget（預算）年年都係800蚊以下，超過一千、八百我就有啲卻步，始終成本效益。」

陸先生今年買了一紥紅玫瑰送給太太，「佢次次都叫我唔好買，不過我唔聽佢講」，但太太收花的心情一向不俗，他認為「都係心意，同埋𠵱家疫症底下，更加要做多啲嘢，因為個個戴口罩，掛住防疫，失去咗啲朋友應該嘅關懷，未必一定係慶祝愛人，朋友未有疫症之前好多都會送朱古力，同啲親友講聲情人節快樂，其實情人節唔係屬於情人咁簡單，我覺得係屬於成個世界、成個香港。」