【萬聖節化妝造型】炸雞面具拼薄餅風褸：「我係一個外賣仔」

萬聖節大家努力地扮鬼扮馬，其實扮人，一樣可以成為焦點。
而今次講的是扮外賣仔，將兩大快餐KFC與Pizza Hut大結合，一次過送晒炸雞和薄餅。

先由頭說起，KFC官方出品的Halloween Harland面具，就選來人所共知的品牌創辦人Colonel Sanders為藍本，有齊他的白髮、自鬚和黑色眉框眼鏡這三大標記，再加送印上黑色領結和白色孖襟西裝招牌造型的塑膠圍兜，簡直有如上校上身，價值方面只售美金$5（約港幣$39），平過一人套餐小小，KFC的官方網店有售，並且可寄香港，仲趕得切萬聖節用。

至於身上衣，就輪到Pizza Hut出手。他們先設計出外賣保溫袋，用上滑雪服飾中常見3M Thinsulate專業絕緣物料等三層隔熱裝置，令到外賣薄餅保持熱辣辣；而Pizza Put再將這設計套用到服飾上，帶來Pizza Parka風褸，源用外賣保溫袋的紅黑配色，這不是純粹噱頭，功能上不比專業Outdoor品牌遜色，如同外賣保溫袋般，防水又防雪，令身軀風吹雨打下仍能保持溫暖，最有趣是內裏有三角形的Pizza袋，夠晒貼題之餘，亦令到帶一片薄餅出街食也不怕變凍。可惜，這風褸暫時不作公開發售，只在美國薄餅月National Pizza Month期間網上叫外賣先有機會贏取。