網上交友不求人 Tinda Finger由無聊爛Gag變眾籌成功Gadgets

撰文:黃正軒
出版:更新:

現代人可以成日唔見一個人,但無手提電話用就一定會死。即使一班朋友出街食飯,都係個個做低頭族自顧自對住部機。人類作為群體動物,演化到用通訊程式溝通仲頻繁過面對面傾計,如果世上真係有造物主,面對呢番光景都唔知畀咩反應好。

Tinda Finger是一隻透過USB插頭攞手機電驅動的自轉蠟製手指,指頭黐住塊軟膠撥片,減低掃相的磨擦力以增加速度。(Tinda Finger)
Tinda Finger據說一個鐘頭可以掃相6000張!逢人都Like,大大增加用家搵到真命天子天女的機會!(Tinda Finger)

經濟發展急速,打工仔工時一年比一年長,緣份要靠自己爭取。大把戀棧網絡的師兄師姐對Tinder和Facebook等交友網絡應用程式上癮甚深,但好多時都屬心癮。因為心癮而浪費生命光陰真係好唔抵。所以就有高人研發了「Tinda Finger」這人工手指來自動向右掃相,一個鐘頭可掃高達6000下!等你跟親朋戚友維持正常社交生活之餘,仍可繼續瘋狂在網上識女識仔。

粉紅同藍色兩款可供選購。(Tinda Finger)

「Tinder Finger」本身是一個網絡潮語,對象自然是經常在熱門交友應用程式Tinder結識異性的網民用戶,在Urban Dictionary定義泛指手腕和手指因常在Tinder掃相(向右掃代表Like,左掃就係Pass)而患上的勞損性關節疾病,可見是個諷刺/自嘲用的無聊爛Gag。

但「認真地搞笑」是世上好多人的作風,幾低能嘅嘢都有捧場客。有班人一開始只諗住惡搞,在Kickstarter開了「Tinda Finger」自轉手指掃相器的眾籌戶口,入場費為7歐元一個。點知不單止在限期前達標,截至10月初集資還要超額完成兩倍半!

(Tinda Finger)

Tinda Finger容納iPhone同Android機,用Lightning、Micro USB或USB-C的制式連接都得,最快今個 12月開始發貨。買來當聖誕禮物送畀Tinder中毒的老友潤下佢其實都幾幽默。不過如果真係想認真使用以增加人緣嘅Tinder友要注意,最好買咗「黃金用戶」Tinder Plus(掃相次數無上限)的月費/年費Plan,因為免費用戶每日掃相有上限,小心用Tinda Finger狂掃搞到畀系統Bam你acc!

你可能感興趣