【解剖鯊魚】被素食者質疑玩弄屍體　網民：即係醫生解剖都有問題

今早有網友在facebook素食群組「素食青年」轉載有關教育中心的貼文，並指：「看看這所講教育機構在幹什麼」，即引來網民熱烈討論，有人回應指「中學生物科已經要解剖，除非唔畀小朋友讀理科」，亦有人指「咁啲醫生去解剖係唔係有問題？」

記者向該教育中心查詢，發言人Janet指，解剖魚類是回應小學6年級科學有關「生環環境」的課程，「條鯊魚係死嘅，係導師喺元朗的街市買返嚟，如果解剖一條可以喺街市買到嘅魚都有問題，我真係無語」。她又指，其實不擔心被人「公審」，但學生的樣子被放上網上群組，是最令她反感。

她又表示，很多人會嫌魚類又腥又骯髒，會不想接觸，但如讓小朋友從小接觸不同的事物，將來在中學或參與其他課程時再次遇到的話，「例如中學要劏牛眼」，他們會更有信心、更投入去學習。

除了回應校本課程的科學實驗外，教育中心另有提供3歲至14歲恆常的科學課程、季節性的日營課程和暑期課程等等，也鼓勵小朋友動手嘗試和體驗。「喺復活節舉辦咗一個有關雞蛋嘅Day camp，踩上雞蛋係學習力學，仲有其他內容係學分解雞蛋、DNA等等。」Janet說，中心會提供足夠的保護設施予學生，例如眼罩、口罩和手套等。