【芳療小分享】暈車浪必備精油大公開│荔枝孖媽

撰文:荔枝孖媽
出版:更新:

大家出遊時最擔心發生咩事?唔舒服、唔見嘢、迷路等等?! 有一樣可能係最不為人留意,但又係最困擾嘅,就係暈車浪。
有朋友仔一坐長途機,長途巴士,或者坐船,未到步就已經要叫救命!其實暈車浪嘅醫學名稱係「MOTION SICKNESS」。我們嘅腦部會透過眼睛和內耳朵嘅半規管來感應空間感。當我哋置身喺交通工具之中,內耳會感覺到細微且肉眼睇唔見嘅身體移動,當大腦接收到呢兩邊分歧嘅訊息時,就有可能會形成暈眩嘅感覺,有人更甚可能會出現噁心、嘔吐同冒汗嘅徵狀。
【編按:作者為荔枝孖媽】

相信好多人都會見到公公婆婆坐車坐船時,會預先搽定藥油止暈,無奈當我一聞到呢啲藥油味時,本來明明唔想嘔就會反而搞到想嘔,好大件事!暈車浪嗰陣成身都無力,個胃又好似攪下攪下咁,成身唔多舒服,呢種無能為力嘅感覺,相信無咩人會喜歡。

有無諗過自己都可以動手DIY支止暈止嘔成份全天然嘅精油滾珠旁身呢?

以下就同大家分享一個超簡單嘅方法:

 

DIY止暈Roll On滾珠:

村料:
4滴 Peppermint Essential Oil 薄荷精油+10ml 綜合複方純植物油 混合在一支Roll On滾珠中。

用法:
可以搽喺太陽穴,胸口同胃下嘅位置,亦可以直接吸入助舒緩。
有時我會將精油滴喺紙巾上吸入,來達到安撫效果。亦可以令唔舒服嘅身體得到放鬆,不安嘅心靈同時得到安慰。

其他建議可用嘅精油:

Grapefruit Essential Oil 西柚精油
Bergamot Essential Oil 佛手柑精油
Ginger Essential Oil 薑精油
Lavender Essential Oil 薰衣草精油
Frankincense Essential Oil 乳香精油
Geranium Essential Oil 天竺葵精油

另外,出發前可以選擇食比較清淡嘅食物,又可以喺搭車之前1小時左右,飲定薄荷茶。仲有可以預備話梅、生薑片等。因為梅喺我地消化之後,可有效中和體內酸性,亦對預防暈車浪有一點效果。

而搭車時,如果比較易暈車浪嘅朋友可以坐前啲嘅位置,視線向前同睇遠啲都會無咁易暈車浪,而坐車時頭部盡量靠住椅背,咁行車時嘅搖晃造成暈眩感亦會降低,仲有打開窗保持空氣流通都有幫助。

當然最天然又有效就係運用芳香療法啦。之前同大家開心share嘅滾珠Roll On真係好方便,只要隨身攜帶,無論係出遊時要坐長途車,定係平時遇到急煞公共交通工具、擁擠悶熱嘅MTR又好,呢支DIY 嘅Roll On都可以大派用場,既可以舒緩暈車浪時嘅噁心同暈眩,又可以令人感到清涼嘅甜味。

當你感到有啲暈眩、唔舒服個陣,就可以直接將精油滴係手巾/品質優良嘅紙巾上直接嗅聞,而除咗啱啱介紹過嘅精油之外,我有時亦會用到一啲複方精油;因為好方便唔洗自己mix blend,只要加入綜合複方純植物油來稀釋就可以了。

複方精油一
內含檸檬草、迷迭香、茶樹、香桃木、香茅、薰衣草成份。
呢支複方精油有淨化效效,能產生乾淨、清爽、令人振奮嘅香味,仲可以用黎清潔同舒緩肌膚,對蚊叮蟲咬後亦有顯著幫助。可以坐車前將呢支複方精油搽少少在後耳。

複方精油二
內含薄荷、綠薄荷、生薑、豆蔻、茴香成份。
呢支複方精油既可以平撫偶發性壓力,亦可以舒緩暈船,暈車所導致嘅作嘔感,帶來平和、放鬆同鎮靜情緒。
只要簡單將呢支精油搽係太陽穴同肩頸,就可以有效緩解反胃嘅不適感。

此外,小朋友成日都可能會話公共交通工具有陣味,同覺得好車箱好焗,呢個時候小朋友可以用比較溫和嘅嗅聞方式,Lemon Essential Oil 檸檬精油對小朋友亦係一個不錯嘅選擇,可以簡單打開蓋去嗅吸,亦可以將一滴Lemon精油滴係紙巾上來聞。

大家都可以係出發時應用這些芳香療法小知識,可以安心出遊。以後暈車浪‪、‎暈船浪、 ‎反胃、‎作嘔,都再無有怕了。唔好再比暈車浪阻擋大家探索世界呀。

荔枝孖媽(Facebook專頁 , Blog)

*美國NAHA國際芳香治療師 * 嬰兒按摩及瑜伽指導師 * 國家兒童遊戲治療師* 兒童體適能教練 *
一日之間,成為兩子之母!充滿愛與驚喜。曾經致力遊歷世界唔同的地方,到而家變成致力育兒的雙職媽媽。希望把生活中每一個美好時光都記錄下來。親子育兒,美容扮靚,飲飲食食,購物,好物都想同大家分享! 更希望與大家一起見證孖寶的成長,分享他們生活的大小趣事。