當獨立遇上溫柔 以超乎常人耐力去留住爛玩的心:唔知佢癡定我傻

撰文:
最後更新日期:

「以前如果你同我講,冇Samantha就搞唔成間餐廳,我會好嬲。因為我性格好獨立,咁講就好似覺得我唔得。但我𠵱家知道,冇咗佢,間餐廳唔會咁好,甚至唔會係咁。」

如果你認定佢係你老婆,就應該say yes to everything。
May

Samantha(左)與May(右)交往八年多。(黃寶瑩攝)

位於中環某街角的藍色小店,是去年亞洲最佳女廚師獎得主May的餐廳。店內只有二十個座位,似乎難以經營,但因為她們二人的耐性與努力,種出超過想像的收成。同樣,耐性與努力也可以改變一個人,把一個貪玩又不認真的人,變成願意為你想將來。

May與Samantha相戀八年,同為中學同學,相知不相熟,更似是「整定」般,May出席的同學聚會,Samantha也會無故缺席。兩人有印象的初見,是八年多前在港島街上的某個早上。「起初我對佢嘅印象唔好,覺得佢好港女、扮ABC;我諗佢對我印象都唔好,覺得我係超級蒲精。」滿身酒氣的May戴着副大黑超,正回餐廳作準備;Samantha則在服裝店前排隊買限量版。錯落的再遇成為兩人相熟的時機,後來才發現原來對方是可以溝通的人種。

對於二人的關係,Samantha一開始就來真,倒是另一位卻是玩的心態。(黃寶瑩攝)

「我好知自己要咩,都唔會後悔,所以當時就決定同上一個分手,第二日就同May一齊。」當May以為女生們說分手都要待上半年,她卻斬釘截鐵,把話說清,就搬離前度家。突然間,一份認真的決心放在她眼前,「一開始係抱住玩嘅心態,其實我唔需要拍拖,好多朋友,又鍾意自己一個,其實我係唔需要透過拍拖而感到被愛。」她的玩與過份獨立,成就了二人拍拖時不少經典情節。

Samantha說自己能應付她,全因自己極大的耐性。(黃寶瑩攝)

試過一次,Samantha得病要求May留家陪伴,May卻因為一個多年沒見的朋友,而堅持外出,還叫她「食藥瞓住先」;喜歡玩的性格又令她時常在夜裏失去蹤影,要Samantha等了又等;獨立的她喜歡自己去旅行,多過一般情侶的一同外出旅遊;又試過因為May說夢想是要個自己的農場,Samantha親手製作了一個小型農場模型給她,收到時她卻完全忘了自己的「夢想」。

回憶至此,Samantha也不禁問:「到底係你癡定我傻?」不知是癡或傻,但大槪她耐力超乎常人,面對所愛的人獨立又貪玩,有人會選擇委屈地默默承受,更多人是寧可揀過個,她卻是試到世界盡頭。「拍拖頭3年都係sweet,但之後就係睇你想唔想就對方。」既然愛的人是如此獨立,那她就嘗試學會獨立,跟上那人的步伐,試從她的角度出發。

人們常說人是不會變,但人還是多變的,就看對方是否願意為你改變。

「當你同一個人行咗7年嘅時候,你會知道唔可以冇咗佢,冇可能再搵到一個人同你一齊經歷返咁多嘢。」用耐性處理日常相處,也用行動支持May創業,陪她走過情緒不穩的時間、開業初期的手忙腳亂、事業上的種種預料之外。

這個收成期大槪就是她苦盡甘來的成果。(黃寶瑩攝)

「以前我會成日想搵過更叻更靚嘅人,但𠵱家冇咗佢的話,就好似冇咗成段過往嘅人生一樣。」May說,過往六年是Samantha的付出期,現在該是她的收成期。「我想畀到佢想要嘅佢,安全感、家庭、承諾......」

堅持是否一定有回報,不敢說,但至今對方的改變全因她一直的認真。「如果你認定佢係你老婆,就應該say yes to everything。」

首飾提供:周生生

《女生》總在你身邊,請立即下載《香港01》App



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。