【真香港人】荃灣人必有共鳴十件事 踏上那震震下的天橋

撰文:周詠雯
出版:更新:

荃灣,一個位於九龍同新界交界嘅地方,出九龍同入新界東、西都同樣方便。一提起荃灣,好多人都話荃灣好多嘢食、好多嘢買,係荃灣人就知道,其實理想同現實,係有啲距離嘅。
以下呢十件事,身為荃灣人嘅你又有無做過?

曾經是全港規模最大的音樂噴泉,已在2008年拆卸。(互聯網)

1. 消失的音樂噴泉

在荃灣生活無廿年也有十多年的你,
荃灣廣場音樂噴泉必定是你的童年回憶,
那個當時為全港最大的音樂噴泉,

燈泡照出彩色光線,
噴泉噴水至近五層樓高,
由小孩視角往上望,
壯觀得不得了。

每次表演時,
二樓、三樓也逼滿圍觀的人群,
亦有人會在音樂噴泉表演時,
走到旁邊的扶手梯「瘋狂上落」,
務求可更近距離欣賞音樂噴泉。

可惜,
此情此景已成追憶
音樂噴泉已在2008年3月13日拆卸。
現在再經過同一位置,
也只能看見那空蕩蕩的中庭,
又或是變成旅行喼、家庭電器或汽車展銷場
不免有一絲唏噓。

荃灣廣場的舊標誌,是由荃灣的英文簡稱「TW」組成。(YouTube截圖)

2. 那些年的荃灣廣場

以前,荃灣人都愛叫荃灣廣場做「吉之島」
那是「吉之島」還未搬走、
又未易名做AEON的九十年代。

由於以前吉之島開設於荃灣廣場內,故不少人會直接叫荃灣廣場為「吉之島」。(YouTube截圖)

去「吉之島」,是當年荃灣人放假的熱門活動,
地庫是宜家家俬、地下有哈迪斯;
中間數層有吉之島、五樓還有玩具反斗城,

簡直是食、玩、買集於一身。

在還未有很多手機遊戲及互聯網的年代,
小朋友一聽到要去吉之島,
真係開心到不得了。

3. 永遠的中染

有些地點即使多番改名,
它在大家心中,
它的名字也從未改變過。

位於愉景新城旁的八咪半,
荃灣人都愛叫它「中染」,
原因並非該大廈以前叫「中染新城」,
而是該地是中國染廠大廈的前身
愉景新城現址,在60年代亦是紡織廠

網上亦能找到中國染廠的舊照。(互聯網)

至於「中染」的新名「八咪半」,
其實亦不是亂改。
由於建築物位於青山公路,
而青山公路最初是以「咪」去計算距離,
「中染」現址位於八咪半、
灣景花園是九咪半、

同屬荃灣區的深井為十三咪、
黃金海岸則是十八咪半。

2012年,英皇娛樂廣場易手,並改名為大鴻輝(荃灣)中心。(互聯網)

4. 打邊爐集中地英皇娛樂廣場

「英皇娛樂廣場」,
現時已轉稱「大鴻輝(荃灣)中心」,
不過大家都係會改唔到口。
繼續叫英皇。

英皇是一眾荃灣友打邊爐食放題gathering熱門地點,
未去過英皇食嘢,真係枉為荃灣人。
每到假日,電梯大堂必定有成百人打哂蛇餅,
係荃灣人嘅,
book檯book六點半,
最遲六點二已經到英皇,
點解?
要留時間等lift啊!

仲有,英皇有透明升降機可以睇到荃灣景觀,記得唔好錯過!

5. 米線之都

「荃灣好似有好多好嘢食㗎!」
人人都覺得荃灣美食多,
不過住在荃灣的人,
有時也會覺得乏味。

路德圍米線粉麵店林立,令路德圍被譽為米線之都。(資料圖片)

路德圍出名多嘢食,
但兜一圈就發現有不少米線店,
而在區外人眼中,
荃灣亦有些米線店「必食」,
但老老實實,
食咗十幾廿年米線,
就算幾好食都好,
好難唔覺得dry

橋、橋、橋、橋、橋。荃灣周圍都係橋。(資料圖片)

6. 天橋之城

荃灣出名食之外,
大量天橋貫穿區內各地,
亦不能不說是特色之一。
不過呢堆橋,
等佢起好真係等到花兒也謝了。
筆者由中學等到會考再等到高考再等到大學畢業,
天橋峻工日期一次又一次推遲,
等到2013年,
天橋終於完工,
但企上橋卻feel到條橋震震下,
相信不少人也體驗過。

雖然天橋可貫通荃灣及荃灣西站甚為方便,
不過天橋亦令行人更多來往各大商場,
荃灣友,不妨多啲落橋親近地面小店!

荃豐中心商場,小店集中地!(資料圖片)

7. 以荃豐一帶商場為榮

之前有媒體以「荃灣啲天橋竟然多到連到20商場」作介紹,
當中「荃豐系」商場亦榜上有名。
如果葵廣是葵芳草根的標誌,
荃豐一帶商場就是荃灣的小店熱點。
荃灣人就會知,
荃豐是個有趣的地方,
有幾趣?

荃豐中心商場開始一連六個商場,
包括荃豐、華都、昌安、昌寧、豪輝一期及豪輝二期
各商場內全都是小店,
賣衫、賣鞋、賣米線(係呀又係米線)、賣齋和賣餃子。
想當年一眾學生哥常踏足豪輝一二期,
因市場上較有名的補習社,
亦會眾集於此。
一堆堆學生哥在商場內排隊等上堂,
亦是豪輝獨有的風景。

另外,荃豐其中一層集中賣電腦產品,
不過同層亦有賣四仔的店舖、羽毛球拍拉線舖、
撈麵店及簡體字書店(可惜已結業),
可算是奇觀。

大陂坊(左)及二陂坊(右)。(資料圖片)

8. 陂坊s

甚麼是陂坊?
陂,粵音bei1(卑),英文譯音為pei。

不知何故,雖然人家的讀音明明叫「卑坊」,
但身邊總有些人(包括我自己),
會無緣無故叫它做「波坊」,
一叫就廿多年。

陂坊的意思,是樓宇面向一個中庭,
感覺像天井般,是為陂坊。

荃灣有大陂坊、二陂坊、三陂坊及四陂坊
各個陂坊各有特色,
大陂坊是雜貨店聚集地,
二陂坊是福建人眾居的小社區,
三陂坊是打冷及邊爐雞煲集中地,
至於四陂坊,就有一間頗為有名的米線店。(係……又係米線)。

沿著海旁跑步,相當寫意。(資料圖片)

9. 屬於荃灣人的海旁

海之戀、愛炫美、柏傲灣……
一眾荃灣西樓盤甚為搶手,
荃灣人只會笑笑口說,
「對住個咁臭嘅海,唔使開窗啦!」
(咁當然講嘅人都係唔夠錢買新樓……)
由當年萬景峯開始,
一幢又一幢沿海新樓,
想睇海,
唯有行到海旁最最最最出位置,
仲係影日落靚位

荃灣海旁面向青馬大橋,是拍攝日落靚位之一。(資料圖片)

不過荃灣海旁,
卻是一眾荃灣友愛到之處。
Pokemon GO風行時逼滿小精靈訓練員不在話下,
每逢大時大節,
荃灣海旁也會擠滿人,
三五知已席地而坐,
開支啤酒(或汽水)
望著青馬大橋暢談一個夜晚。
如此夜色,亦非有錢人專利

至於運動型的朋友,海旁也是必到之處,
沿著海旁由麗城跑到海濱來回,
剛好是一個5 KM,
想跑得更遠的,
可向麗城方向跑至深井,
荃灣海旁,
總是荃灣友跑步的起點。

深井有不少燒鵝名店。(黃樂怡攝)

10. 深井燒鵝頂呱呱?

同樣位於荃灣區的深井,
以燒鵝及甜品馳名。
相信係深井友就知,
成日畀人問「你係咪成日食燒鵝?」
救命,其實我哋都係普通人,
同大家一樣,
去街市買餸煮飯。

有人會覺得深井好隔涉,
但其實深井有巴士有小巴,
想出荃灣市中心就出,
想過海就過海,其實都幾快。

不過講到最騎呢,
就非燒鵝像莫屬。
有幾騎呢?大家睇睇相,呢隻嘢,整咗百幾萬。

呢隻鵝呢……靚唔靚就見仁見智喇。(資料圖片)

日日出門口就見到佢笑笑口望住我,
我,無嘢好講。

【相關地區文章】

【真香港人】自認地道屯門人? 10件事測試你係咪真
【真香港人】自認地道觀塘人? 一定答得出邊間是「新舊老麥」
【真香港人】7件事知你係黃大仙人 一定去過摩士煲蠟、獅子山BBQ
【真香港人】只有將軍澳人才懂7件事 商場圍城 康城輪迴
【真香港人】元朗人才懂9件事 永年合益與餅叔

發表評論...