【懷舊零食合集】10款90後一定食過的兒時零食

零食是大家都吃過的食物，而每個年代都有屬於那代人的經典零食。
90後的你還記得那些玩得又食得的零食嗎？以下10個經典懷舊零食，絕對會令你的兒時回憶一秒湧現！

1. 戒指糖

戒指糖的賣點
就係可以套住隻手指，
等班豆釘可以幻想
自己真係擁有一隻戒指。

天真無邪的大家
以為套住隻手指就唔會移位？
少年，當年的我們太年輕了。
隻戒指鬆到一個點！
基本上只要揚一揚手，
粒糖就會黏到其他手指。
然後隻手就會「黐笠笠」，
感覺很噁心！

2. 眼鏡朱古力

見到8字型眼鏡朱古力
就會加兩條橡筋將它整成眼罩。
筆者還是細路時，經常幻想著
自己是拯救世界的朱古力超人。

大人常常教導小朋友不可搞破壞，
諷刺的是，要吃到朱古力
必先要把其包裝破壞。
將朱古力逐粒逐粒啪出來，
這個搞破壞的過程，
一個字：爽！

3. 印水紙香口膠

呢款香口膠大大粒
望落好似好抵食，
食落就知好鬼嚡又死甜，
不過嚼多幾吓已經無味，
仲要好快失去彈性，
食到最後個質感就好似食緊泥膠。

講到咁難食點解仲會成為兒時最愛？
因為香口膠並不是重點，
印水紙才是最終目標！

一日唔打開個包裝
一日都唔知會抽中怪獸定超人，
為了令人買多幾粒，
所以抽中怪獸的機率接近99％。

如果咁好彩抽到鹹蛋超人
一定光速印上手
係其他小朋友前威返次。

4. 太空糖

太空糖，同太空一丁點關係都無。
反而包裝袋上有兩隻唔關事的松鼠。
外表硬掘掘，奇就奇在啲粉入口即溶。
由硬到軟的過程只需數秒。
粉糖在口腔內崩壞的過程感覺十分有趣，
那種快感是會令人上癮的，
不自覺地一粒又一粒放入口。

5.唧唧冰

唧唧冰五顏六色，
味道各有不同，
不過十居其九都是伏味。
一支只售一蚊，
同朋友一人一半最抵食。

雖然有個剪口位，
不過大家都會在中間啪開，
如果力水不足可用膝頭借力，
重點是整套動作要瀟灑利落
才能獲得旁人歡呼。

唧唧冰抵食在可以一物二食，
鐘意食冰的話直接大口大口咬
或是等到冰塊半融時把果汁啜入口。

6. 奇趣杯

奇趣杯最令人記得的
不是份量少得可憐的雪糕，
而是在底層附送的卡通人物玩具。
有得食又有得玩，一次過滿足兩個願望。

當年Sanrio跟雀巢合作，
旗下卡通人物陸續登錄奇趣杯，
有Hello Kitty、XO、馬騮仔、大口仔等。

雖然雪糕幾啖就食完，
個公仔又唔知點樣拎出來，
次次都要憑感覺去開。
不過為了儲齊一套，
都是會買完又買，
重複的公仔就與朋友交換。

7. 樽裝可樂糖

包裝跟足可口可樂的設計，
仿真度極高。
一拉開蓋就好似打開潘多拉的盒子，
選擇只有食同食哂，
因為個蓋係合唔返入去的Sorry。

有可樂味同提子味，
不過提子味較甜，
始終都是可樂味較受歡迎。
識食一定係倒入口咁食，
咁先似飲緊可樂嘛。

8. 嗶嗶糖

嗶嗶糖的中間有一個小洞，
可以發出哨子般的聲音。
少不更事的時候，
經常靜雞雞喺人哋耳邊
失驚無神地用力吹。
嚇到人成個彈起，
是每個人童年必定出現畫面。

9. 鳳仙雪條

鳳仙，多麼有仙氣的名字。
一聽已令人心曠神怡，
加上印有椰樹的包裝袋，
令人感覺置身在陽光與海灘之中。

一口咬破香蕉味的朱古力脆皮，
呍呢拿味雪糕瞬間包圍味蕾、
緊接而來的就是酸酸甜甜的芒果冰。
一個價錢，三款口感，三種滋味，
教人如何抗拒鳳仙!

(絕非廣告打手，純粹歌頌，只怪筆者太愛食鳳仙。)

10. 煙仔朱古力

以前士多沒有冷氣，
很多時買回來的煙仔朱古力
都呈半融狀態，
無論你有幾小心翼翼
撕開那層白色包裝紙，
永遠都會有一點點黐住朱古力。

朱古力的難食程度與金幣朱古力一樣，
細個會買來食的原因只有一個：扮大人！
把「煙」放在口中叼住的樣子，
你唔好同我講你無試過呀。