【真香港人】馬鞍山人8件共鳴事　於美食沙漠爭取牛肉飯！

馬鞍山，一個喺區外人眼中好遠好遠嘅地方，搭馬鐵要轉嚟轉去，搭巴士？點解到咗沙田仲要咁耐先到？究竟，住喺馬鞍山同烏溪沙，呢啲區外人視為學校秋季旅行或者去camp地點嘅地方，每日生活係點過？

1.　曾經，馬鞍山不是美食沙漠

一講「馬鞍山」，關連詞必定會有「美食沙漠」，
馬鞍山人（統稱馬友）對美食的渴求，
在爭取牛肉飯店一事上可完美體現。

想當年，馬鞍山有哈迪斯、元綠壽司，又有仙跡岩，
街市有打冷，係夜晚食宵夜之選。

一個二個學生哥，聚在仙跡岩內吹水，
叫個蘿蔔糕，是一種屬於中學生的寫意。

可惜，哈迪斯、元綠壽司和仙跡岩都已經和馬友say goodbye，
現時在馬鞍山大商場開業的，
有網民形容「好多都係懶高級嘅食肆」，
想落街食個便飯都難。

而大家朝思暮想的牛肉飯，
仍在馬友ff的腦海裏。

2.　麥仔、牛肉飯與餅主

講明先，唔係要喺度賣政治廣告，
但麥仔確係好多馬友所認識，
或者係非馬友認識馬鞍山時會聽到嘅名。

一個「牛肉飯議員」的誕生，
源於他2013年應網民要求，
去信牛肉飯專門店吉野家，
希望吉野家在馬鞍山開業。
（可惜到而家馬鞍山都仲未有牛肉飯食，同志繼續努力呀喂！）

至於餅主，你可以叫佢做Eric Chan，亦可以叫佢Rick Yuen。
點解咁多馬友會識佢？

因為佢就係facebook group「馬鞍山之友」嘅版主，
「餅主」一名，就是源於「版主」的諧音。
餅主除了營運facebook群組外，
亦會跳出虛擬世界，
當有馬友反映馬鞍山問題時，
餅主亦會協助去信予不同機構，
改善馬鞍山環境。

3.　陪住大家成長的旋轉木馬

馬鞍山人主要娛樂，
基本上均集中於新港城和馬鞍山廣場。

小時候會覺得，馬鞍山廣場是為兒童而設的商場，
廣場內的旋轉木馬，個人感覺比海洋公園更靚！

旋轉木馬的座位亦非100%馬，
還有長頸鹿、斑馬、老虎、兔和鹿仔，
當中以兔仔和鹿仔最受歡迎，
小時候，常常「眼甘甘」望著兔子在快樂旋轉；
亦有不少中學生會著校服玩旋轉木馬！

4.　新港城音樂噴泉

相信有睇過商場音樂噴泉嘅馬友，
現在舊地重遊，
不多不少也會有點失落。
因為你同我，
都一齊睇住音樂噴泉噴水、
停止表演、到拆卸，直至消失。

近十年，噴水池無再響起音樂、
水流亦無再隨住音樂舞動。

曾經，有好多人夾定時間，
圍喺音樂噴泉旁邊睇表演；
百厭啲嘅，就行近水池掂一掂啲水。

可惜音樂噴泉捱到2017年，
亦要黯然離去。

5.　馬鞍山戲院

2016年一套《十年》，
令上映這套電影的馬鞍山戲院突然爆紅，
區外人被平價戲飛吸引
睇早場3D電影亦只需$55，超值。

但區內人就會知道，
馬鞍山戲院除戲票價格廉宜外，
戲院可讓顧客自攜食物飲品入戲院，
唔賺到盡逼你買熱狗入場食。

呢種胸襟，得馬鞍山戲院嘅老闆先做到，
大家去馬鞍山戲院睇戲，
就好似喺屋企睇戲咁。

呢種feel，喺大型連鎖戲院一定感受唔到。

6.　馬鞍山的屋邨人屋邨事

馬鞍山不少住宅的名稱均有「安」字，
與鞍字同音，食字嘛！
由富安花園開始，欣安、恆安、頌安、耀安、福安花園和利安，
一個個「安」字都是馬鞍山的印記。

想當年馬鞍山人口未及現時多，
沿海私樓還未興建時，
利安居民唔使出街就可以睇到好靚日出日落，
可惜由00年代起，
一幢又一幢私樓建於海邊，
過去景象已不復再。

以前，馬鞍山不少屋邨內均有文具店和報紙檔，
不過現時已摺得七七八八。

7.　消失的百貨超市

喺馬鞍山呢個去邊都要搭好耐車嘅地方，
一間大嘅百貨公司，
都可以為大家提供一個消閒好去處。
提到這一點，
相信唔少馬友都好懷念昔日嘅八佰伴，
八佰伴一到馬鞍山，
馬友們都可以慳返唔少搭車時間。
而另外，大型超市家樂福亦一度想進駐馬鞍山新港城中心，
但最終因為租金等問題而告吹。

8.　烏溪沙沙灘

烏溪沙沙灘，可算係馬鞍山人嘅「另類後花園」，
雖然沙灘久唔久都會好多垃圾、
又有砌心型石與否嘅爭議、

亦無石澳、長洲等沙灘的幼沙，
但難得一個小小區域也有屬於她的沙灘，
其實亦是美事。

除此之外，
海濱長廊亦馬友的寵兒。
黃昏時份望著落日、迎著海風跑步，
是人生一大樂事。
想挑戰自我者，
更可由烏溪沙沙灘跑至大埔！

其他地區文章：

【真香港人】荃灣人必有共鳴十件事-踏上那震震下的天橋
【真香港人】自認地道屯門人？　10件事測試你係咪真
【真香港人】自認地道觀塘人？ 一定答得出邊間是「新舊老麥」
【真香港人】7件事知你係黃大仙人 一定去過摩士煲蠟、獅子山BBQ
【真香港人】只有將軍澳人才懂7件事 商場圍城 康城輪迴
【真香港人】元朗人才懂9件事 永年合益與餅叔

你都想成為開筆一份子，稿件可電郵至opener@hk01.com；文章純屬作者意見，不代表開罐立場。