90後3大劣食回憶 明將紅豆軍艦打大佬
講起劣食，相信各位90後都一定會答明將。明將之劣，劣到衝出國際，引來外國傳媒親身到香港試伏。不如就喺今日，我哋回味下陪伴我哋成長嘅劣食！
1. 明將壽司
要講劣食唔提明將，
就猶如睇選美無泳裝環節一樣。
曾位於深水埗西九龍中心的明將，
成為大家帶同好朋友好兄弟好姊妹結拜之處，
係friend嘅，就同我食咗佢，
嘩，真係好轟烈，
又，香港嘅烈士都真係好多。
點解明將咁劣？
因為明將的壽司飯是用機器cup出嚟、
上到檯仲熱辣辣、
紫菜因為飯嘅蒸氣濕到淋晒、
壽司豉油鹹到hihi、
啲魚薄過紙、三文魚望落去甩晒色、
腥到不得了、
仲有人覺得壽司飯有胳肋底味……
（係咪要食過胳肋底先知？）
醋鯖魚壽司 - 我一睇就知佢殺傷力大，所以我第一時間係用個鼻索下咩味道……一索已經想嘔（唔係講笑）， 但入得嚟當然要食㗎啦，結果我閉氣咬左一細啖，但真係吞唔落口……食嗰陣眼水差啲都出埋嚟， 飲左成杯水都係仲有嗰隻味……
除了正常壽司難食到不堪之外，
明將創作的騎呢壽司亦聞名中外。
騎呢紅豆軍艦、
一pat如嘔吐物的吞拿魚壽司、
九唔搭八的鴨胸壽司、
還有疑似創新的魚蝦蟹壽司。
究竟，我食咗啲咩？
可惜西九龍明將已於2014年結業，
並轉成「韓日燒自助餐廳」，
明將的光芒，
自此永存在港人心中。
2. 大久保
於2008年結業的大久保，
雖然名聲不如明將般大，
但劣食程度卻追得上明將。
大久保之劣，
除了服務差、食物難食之外，
衞生程度亦令人咋舌。
當年大久保推出$48午餐放題，
抵還抵，
吞唔吞得落先係最重要。
掃視大久保的食評，
「腸胃炎都算，我懷疑有大腸桿菌，
因為我哋好返之後，
成三個星期都仲食唔到嘢，好辛苦」、
「返到家10pm，1045pm開始搞肚痛，
1130pm已經屙左兩次，
即刻飲藥水，之後再屙一次先停。
小人身壯健,，殘命得苟全」。
可見到大久保食飯，
不是挑戰劣食，
而是玩命。
3. 兆萬
兆萬是個神奇的地方，
神奇在它被評為「劣食之塔」，
整幢樓無一倖免，
要紅一齊紅，
要劣一齊劣。
在Google打「兆萬 放題」，
便會見到某討論區的帖文，
題為「【劣食塔】兆萬放題 狗也不X」。
兆萬這個劣食塔，
其實相比起明將和大久保，
已經好好多。
問題大多都是各間放題漏單、
「落十次單漏足十次，
食一個鐘放入口唔多過五樣嘢食」，
加上炸物不停上檯，
以求塞飽顧客個肚，
難怪大家都食到好火。
相關文章