舊區面臨清拆重建 「畫下嘢」留住香港昔日風景

撰文:
最後更新日期:

市建局早前就士丹頓街/永利街重建項目向城規會申請放寬地積比率,在原為舊式唐樓的位置上興建20層高商住大樓,但就被批評毀舊區特色。近日,市建局決定撤回有關修訂方案。

「本身係好鍾意畫畫。所以都想用寫生認識返自己社區。畫返舊嘅回憶。」市區變改令人興嘆,卻也引起一群喜歡「畫下嘢」的人走入小街窄巷重新探索社區。這次他們來到上環士丹頓街,以畫筆為舊日香港留痕。

App用戶請按此開啟瀏覽器觀看短片

「畫下嘢」發起人在上環一帶舉辦社區速寫活動。(任意行攝)

畫過長沙灣、中環永和號
以畫保留本土記憶


從事設計行業的彭啤,去年11月
與另一位同樣喜愛畫畫的友人
成立「畫下嘢 Wahayeah」專頁,
定期舉辦城市速寫活動。
「本身好鍾意畫畫,
所以都想用寫生認識返自己社區,
畫返舊嘅回憶。」

約30人聚在上環城皇街「畫下嘢」後留下合照。當日雖有微雨,卻不減參加者對畫畫的熱愛。(畫下嘢 wahayeah圖片)

之前畫下嘢召集一眾愛畫之人,
去過長沙灣、中環永和號、
跑馬地山村道54號大宅、
北角繼園街等繪畫舊區面貌,
兼與參加者分享該地的社區故事。

來到上環永利街,
背後亦有故事:
「2010年有套電影叫《歲月神偷》,
令大家了解返永利街嘅情況,
將佢由原本嘅重建範圍剔咗出嚟。
不過依家佢嘅重建區擴大晒,
喺附近嘅城皇街呀、
華賢坊西、華賢坊東
同埋下面嘅士丹利街
呢幾個部份都計劃撥入重建。」

上環永利街與城皇街交界,是一條長長的樓梯。中西區不少街道都是依山而建,有住在新界的參加者覺得新鮮。(任意行攝)

街坊路過感好奇
坐低一齊「畫吓嘢」

活動當日天色陰暗,
一直下着毛毛細雨。
彭啤先在集合地點
舊必列者士街街市前
(將改建為香港新聞博覽館)
簡單講解士丹頓街重建區背景
及當日活動流程,
然後便着參加者自由活動。


「大家自由活動啦,
兩個半鐘、三個鐘左右。
可能佢對呢個街角有感覺嘅,
就會坐低畫呢個街角。
之後我地會排晒啲畫出嚟,
互相欣賞返大家嘅作品啦。
然後會邀請返嗰位朋友仔
講解返點解畫嗰個角度,
有冇遇到咩特別趣事呀。」

彭啤成立《畫下嘢》後,會定期組織市區速寫活動,以畫會友。(畫下嘢fb圖片)

喜歡舊唐樓:下面做生意
上面住 充滿生活感​


「自己中意舊唐樓
係因為佢個騎樓同採光嘅。
依家好少建築的露台會貼近街道。」

彭啤認為唐樓與樓下生活環境貼近,
是令舊區充滿人情味的原因。
「檔主自己做返生意,
唔係大集團嗰種營運。
老闆同街坊關係密切,
都係我喜歡舊區嘅原因。
下面就係做生意嘅地方,
佢哋就住喺上面。
覺得係好充滿生活感嘅
建築方法、生活方式。
我覺得呢啲地方香港係值得保留,
而唔係變晒洋樓。」

彭啤當日架起小凳在華賢坊西作畫,他說自己最喜歡唐樓的騎樓與窗框。(任意行攝)

遇好奇街坊
帶埋狗狗一齊畫


舊區的人情味,
除在本土電影或舊日相片的
浮光掠影中品味,
彭啤與畫下嘢的參加者曾親身體會:
「之前都去過唔同區接觸街坊,
有啲街坊住咗好多年,好驚喜。
或者會話『點解咁多人過嚟畫畫嘅,
我哋住呢度都冇乜特別啫。』
亦都試過有啲街坊放狗嘅時候,
見到我哋畫畫
就帶埋隻狗仔一齊坐低畫畫。」

上次畫下嘢在北角繼園街寫生,
也有住在樓上的小朋友
特意回家拿畫具一起畫畫。

今次在上環,
也有路過的街坊見數十人坐在樓梯畫畫,
好奇駐足觀看或是搭話。
亦有畫友與附近商鋪的老闆攀談,
尤如街坊街里。

寫生活動後,由中西區關注組負責導賞活動,在城皇街樓梯分享該區故事與近況。譬如士丹頓街以往原有許多印刷舖、士丹頓街重建計劃的最新發展等。(任意行攝)

畫後Sharing
畫者解構畫作


導賞後是作品分享環節,
三十人在樓梯圍圈,
再將當日畫作放在一起
仔細端詳畫友的作品。
然後由畫者向眾人解構自己畫作,
例如畫了什麼、
為什麼要這樣畫、
畫畫時的想法、
對周邊環境的特別觀察等,
亦有團友會主動稱讚
「畫得好靚喎」
「呢個角度好特別」
「我鍾意佢啲線條」,
氣氛輕鬆自由。

分享會中,畫友會將當日畫作放在一起,再向眾人解構自己的畫作,例如畫了什麼、為什麼要這樣畫、畫畫時的想法、特別的觀察等,氣氛輕鬆自由。(任意行攝)

彭啤表示今次的活動有很多新面孔,
時間較緊迫下只能選擇部份作品分享
「之前都會搵返每位參加者
share(分享)返各自感受嘅,
差唔多每幅都會講,
成個sharing會有個零鐘。」

參加者:望捉緊香港尾巴

Elaine有在分享會中展示畫作,
又帶同妹妹Maggie參加
她表示已數次參加畫下嘢市區速寫,
不過是第一次來上環畫畫。

家在元朗的Elaine,
認為中西區保留了香港獨有風貌,
「譬如叮叮(電車)呀,
其他地區係冇嘅。
我就好鍾意畫呢啲舊嘅區、舊嘅境。」

於港大修讀藝術的Elaine(左),帶同妹妹Maggie前來寫生。姊妹住在元朗,覺得中西區景觀是舊日香港的尾巴,希望以畫畫抓住。(任意行攝)

Elaine以水彩繪出城皇街連接荷李活道一段的雨後風景。(任意行攝)

「雖然我唔係見證住香港嘅成長,
不過起碼都可以捉緊香港嘅尾巴,
睇到好舊嘅景色。」
Elaine表示雖然喜歡畫畫,
卻更希望這些風景能繼續留在畫框以外。
因為沒有風景,也不會有寫生。
「好想之後我老咗都有呢啲舊嘅香港景,
可以陪住我成長。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。