【片】跳出嚟:平面設計Freelance 有幾惡做?

撰文:
最後更新日期:

平面設計師Moby畢業後一直返Full Time工作,間中接吓Freelance幫補。呢啲零碎嘅經驗已令佢體會到Freelancer面對嘅種種難處。

Moby以佢朋友為例,粗略估計淨係接平面設計嘅Job,一個月正常大約搵$10000到$12000,而如果加埋其他媒介例如短片、動態圖像等等嘅Job,一個月就起碼可以搵多$3000到$5000左右。

至於設計公會,其實唔需要好大規模,有一兩個有地位有影響力嘅設計師走出嚟,以顧問身份推動成個行業,一齊制定保障設計師嘅行規、公價,甚至係訂法例,進而做一啲監察同埋個別案例跟進,成件事已經會好唔同。可惜,行內比較有代表性、有影響力嘅人都唔會做呢啲嘢。「如果要做就一早做咗啦!」Moby如是說。

Moby

傾完一大輪,佢黯然地講咗句:「其實,我曾經發過誓以後唔再接Freelance嘅。」原因都唔駛多講,成日遇到啲客都出蠱惑,即使肯出糧、唔走數,都要拖足半年,甚至一年先收到錢。做到心灰意冷,就發誓唔再接Job做啦。

「但係,發完誓之後發覺,有啲Job係推唔到嘅。就係一啲真係無錢收嘅Job,例如朋友結婚,兄弟搭膊頭之類啦。」有做吓設計、影吓相嘅朋友睇到呢度都應該心中有數喇。通常朋友、兄弟叫你幫手,就好少會收錢,就算收都係所謂嘅「象徵式」、「友情價」,又唔想傷感情,就唯有頂硬上,嗰一刻真係會覺得好墮落。

「最揼春嘅係唔知點解呢個行業要咁樣囉。」呢一句,係Moby嘅總結。

到底Freelance作為一種係時間、選擇上自主程度比較高,但同時又要面對好多誤會或者受盡無理待遇嘅職業,仲要捱幾耐,要點樣先可以令自己有餐安樂茶飯?



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。