【復仇者聯盟3】Marvel唔肯公佈預告片　網民：冇得睇我寧願死

萬眾期待的《復仇者聯盟3：無限之戰》，最近終於釋出首條預告片，但已經過了幾日，網上一直未有得睇，莫非Marvel這麼大一間公司都出現技術問題？Sorry，只係佢哋唔俾你睇。

於較早前兩個大型動漫展D23和聖地牙哥動漫展，《無限之戰》的預告片已經在會場內播出，不少出席人士也忍唔住做文字描述，但滿以為在動漫展完結後Marvel會將預告片公諸於世，誰知至今也沒有消息，Marvel更多番出手攔截網上的偷拍版，但依然難阻截圖面世；預告片內容和之前文字描述相約，雷神在外太空遇上銀河守護隊，促成復仇者與守護者合作，蜘蛛俠穿上最新戰衣參戰，奇異博士、黑豹、寒冬戰士等也加入，但最驚喜似乎是美國隊長以一臉鬍鬚的滄桑形象出場，與及大奸角魁隆使出像《龍珠》的氣功波攻擊。

但聽完無數的文字描述又冇片睇，作為Marvel粉絲塵世間最痛苦莫過於此，網上大量留言哀求Marvel，話如果冇預告片睇寧願一死，但據知Marvel不想釋出預告片的主要原因，是不想影響11月上映《雷神奇俠3：諸神黃昏》的人氣，不過以Marvel現在的地位，無論播乜都個個爭住睇啦。