香港電影業慘淡一年內9間戲院結業 廖子妤願減片酬共渡時艱
撰文：吳子生
出版：更新：
廖子妤（Fish）今晚（11日）現身尖沙咀出席電影《曾經擁有》首映禮。對於電影8年後面世，Fish接受《香港01》訪問時表示：「其實唔係好諗得起自己做過啲乜，因為好多片段都好零碎，但有啲記憶亦係好美好，我手機儲存咗拍緊呢套戲嘅回憶，手機不時都會自動陣出呢啲相片，變咗當時成日都會諗呢套電影究竟幾時先會上。套戲今日終於上，我睇返發覺自己變咗好多，例如講嘢嘅咬字冇咁正，同埋聲調係比較高，咁所以好希望呢8年自己係有進步。」
提到香港電影市道慘淡，過去一年全香港有9間戲院結業。Fish表示：「其實我又唔會灰心同埋失望，因為有啲嘢知否世事常變，變幻才是永恆。有好多嘢變幻係一定會有，只係我哋喺呢啲變幻之中，記起我哋曾經擁有嘅嘢呢。（今年有冇戲開？）當中係有傾緊，希望能夠順順利利啦，始終我哋作為電影從業員有工開，先可以維持呢個產業嘅生態，唯有啲老闆能夠大膽啲，我哋又做好啲，然後就聽天由命。（會唔會減片酬？）減片酬？我已經冇乜加過，但共渡時艱就一定會。」