【午夜場】《百變星君》抄占基利　仲記得星爺壓軸變成咩武器嗎？

要數周星馳校園電影，順理成章是《逃學威龍》1、2，不過同學校有關的其實仲有部《百變星君》。星爺飾演香港富豪個仔李澤喜，在夏威夷留學。其實都係掛名有樣細藝，返學都唔係為讀書，全職整蠱同學。而開場冇耐為整蠱王小虎（李健仁 飾）而大費周章，就夠晒經典好笑。

電影於1995年上畫，王晶監製兼執導。當日話開拍，明眼人一睇就知係抄占基利套《變相怪傑》，而你又要知道港式特技的水準真係好難同荷里活鬥，甚至都冇諗過鬥，所以就算搵到周星馳主演，當年的反應都係平平。不過事隔十數年，這股情緒消散過後，大家又開始重新認識它，愛上它。

戲中星爺因被炸到粉碎得番把口同個腦，於是要靠徐錦江的山寨技術，幫佢整番個半人半機械身體，等佢得以續命。不過話明山寨貨，固然戰鬥力大減兼錯漏百出。正牌貨輸入了完全殺人手冊，而這個山寨版就只得本超市秘笈，所以最終亦只能以在百佳廣告出現的黃老太造型登場。不過唔好睇少師奶們的殺傷力，最終星爺就變成一部微波爐，將個正貨叮到爆炸一滴都冇得剩。