【雷神奇俠3】奇異博士現身日版預告 日系彩蛋特別多 

撰文:
最後更新日期:

鐵定於10月26日香港率先上畫的《雷神奇俠3︰諸神黃昏》,幾個星期前香港觀眾已經睇到美版預告,畫面豐富又剌激,令人萬分期待。

至於日本版預告,終於日前見街,雖然遲過香港,就連上畫日都要去到11月3日先係,不過日版預告就比美版有彩蛋,預告開頭就擺個奇異博士Doctor Strange出來壓一壓場。遲過你又點,但我多過你!

不少粉絲見到有奇異博士登場都感到驚訝,但心水清的就會記得在《奇異博士》最後的彩蛋,就有一幕幫雷神斟啤酒,Friend來的。

預告一來,就見到奇異博士個剪影。就算你唔認得個影,都認到把聲吧!

其實整條日版預告,內容都跟原裝版沒太大分別,但剩係多個奇異博士登場已經夠贏。睇片中內容,博士都似乎只係客串下,講兩句對白,並預告雷神將會有前所未有的經歷,對劇情推進應該沒太大幫助,不過由男神Benedict講出來,份量自然會重一點。

又其實,荷里活電影對日本市場向來重視,除了不時會有全新剪輯的預告外,偶然還會有新場口出現,就如《鐵甲奇俠3》,就多了少少Tony Stark同小辣椒的戲份。而《美國隊長3 英雄內戰》,日版又多了黑寡婦同鷹眼反目的對戰場面。看似小恩小惠,但對粉絲來說已經好開心。所以今次有成個新角色登場,算係一個大彩蛋喇!

當日《美國隊長3英雄內戰》日版預告,就多了黑寡婦對戰鷹眼。

《奇異博士》彩蛋之雷神飲啤酒

《美國隊長3 英雄內戰》日版預告



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。