【出貓特攻隊】拜訪《鎗火》場景 杜琪峯飲食地圖你去過幾多個?

撰文:
最後更新日期:

泰國電影《出貓特攻隊》上星期四剛剛上畫,套戲本身都已經係威係勢,加上幾位主角來到香港做宣傳,票房輕輕鬆鬆便超過650萬,走勢凌厲。

幾位主角行程緊密,訪問排山倒海,都冇時間周圍行,於是臨走前一晚,電影公司便安排幾位去食特色美食,並揀選了杜琪峯電影《鎗火》中的主要場景食餐好。

兩位泰式型男,襯上這種雕龍雕鳳場景,特別有風味。

這個場景,兄弟聚會係佢,兄弟反目都係佢,是繼商場鎗戰以外,另一重要情節。(影片截圖)

今次來港的3位《出貓特攻隊》演員包括女主角Chutimon(超蓮),及兩位男主角Chanon(阿賓)及James(柏豪)。幾位連日來不停做宣傳,有謝票又訪問,忙到無時停,無論晏晝定晚飯都係簡簡單單在工作場地食完就算。不過到埗當晚,電影公司都有爭取時間,安安靜靜俾大家食餐好的,並帶他們感受下「香港電影美食地圖」,去杜琪峯電影《鎗火》中的樂口福潮州酒家食晚飯。

雖然幾位都未睇過《鎗火》,但當知道這是來自一部名作的重要場景,都顯得非常興奮,兩位男主角望過相關劇照後,仲即席手指扮鎗演番幕。問到幾位睇過什麼香港電影,都是以動作片為主,包括外國觀眾最愛的Jackie Chan成龍,仲有宇宙最強甄子丹主演的《葉問》等。

3位對於呢個場景都深感興趣,不停影不停chok!

晚飯當日,剛剛踫上電影《嚇鬼阿嫂》的導演班莊·比辛達拿剛也在香港,即興地為James操刀影了兩張。

跟杜Sir電影搵食

可惜時間有限,幾位都只能觀摩一個景點,其實在杜Sir的電影中,飲食場面甚多,而且具特色的餐廳都唔少,不過能夠營業至今的亦所餘無幾,唔知大家又有冇幫襯過呢?

電影《PTU》畫面。

《PTU》中國冰室

在《PTU》中,位於旺角廣東道的中國冰室是任達華與一眾同僚宵夜鐵竇,尤其上層雅座似自成一閣極具風味。冰室已有53年歷史,超過半世紀。因為這套電影,令大家廣為認識這間冰室,隨後有不少導演都愛在這裏租借場地拍攝電影或MV。

以秋生為首的行動組,解決完老闆安危,就要在酒樓清理門戶。

《鎗火》樂口福潮州酒家

這間潮州酒家,不單成為九龍城區的地標級食肆,其50多年歷史更足證九龍城由潮州人聚腳地變成小曼谷的演變。據知這間潮州酒家在60年代是以貴價菜作招徠,叱吒一時的四大探長都是常客,客人非富則貴,店中名菜有高湯大鮑翅、金華紅燒燕等,連一些甚少地方食到的四寶燉元肚都有供應,極具特色。

沙Sir在這場戲威到盡,事後被淋油就失威。(《PTU》影片截圖)

《PTU》方榮記

同樣是來自《PTU》情節,開場不久沙Sir林雪便因為打邊爐座位問題,跟一眾古惑仔結怨,間接導致失鎗。最後一個其貌不揚的殺手出現,更是該場戲的亮點。這間位於九龍城的火鍋店屬老字號,主打沙嗲湯底以及各式各樣的新鮮牛肉,算是區內名物,不少人慕名而來。早前杜汶澤在飲食節目《食住上》都有介紹。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。