【午夜場】《見鬼》一代鬼片經典 搭𨋢舔叉燒寫書法你最驚邊幕？
撰文：許育民
出版：更新：
今晚係農曆七月十四盂蘭節正日，正所謂盂蘭節「戲」魄更壯，所以今個星期就同大家分享盂蘭好戲。
要數近代港產經典鬼片，一定要係《見鬼》（2002），睇鬼片為咩？咪就係見鬼，可見戲名幾咁簡單直接直奔主題。
一個人搭𨋢，通常都揀靠牆企，好似比較有安全感。（影片截圖）
呢幕舔叉燒，有冇搞到好一段時間唔敢食叉飯？（影片截圖）
伯伯冇突然彈出來，但就已經夠晒恐怖。（影片截圖）
一程長途客𨋢
《見鬼》經典之處在於橋段夠生活，搭地鐵會撞鬼，食叉燒飯會撞鬼、寫書法會撞鬼，而今次為大家揀選的一幕是李心潔在戲中獨自搭𨋢，撞見一隻凹頭阿伯鬼。說真的，那個阿伯的裝扮不算恐怖，所以這一幕完勝之道是氣氛。時下的鬼片，經常犯下一個大錯，就是在橋段不足下，通統靠聲效搭夠，拉張椅開道門都鬼殺咁嘈，更不用說突然彈出的情節，往往是「先聲奪人」。這一幕出色之處在於沒有突如其來的彈出彈入或者伸頭縮腳，全程就是勝在夠慢。
由心潔入𨋢一刻開始，你就開始替她擔心，你明知會有事發生，但你不知道點樣發生，然後𨋢內慢慢出現一個人影，就算心潔已經好醒唔敢四圍望，但𨋢門那個不清不楚的反影，眼尾瞄到的那副陰影，以及背部感受到的寒意，全部都比眼見到的更恐怖可怕。而且這程𨋢非常緩慢，足足要上14層樓，那種度日如年的感覺好令觀眾投入至深，要你慢慢受到時間流動的折磨。
呢幕「俾番個位我」，又係勝在夠靜。（影片截圖）
一代鬼王鬼后
能夠成為經典一幕，因為大家都會搭𨋢，仲要日日搭時時搭經常搭，而且獨處的機會特別多，所以你話呢幕點會唔睇到人心寒打冷顫？電影的成功，令執導的彭氏兄弟成為一代鬼王，好一段時間拍親鬼片都會諗起兩位，只是《見鬼》實在太經典，後作都難以超越。至於女主角李心潔，除了因這部戲贏得一份姻緣，更讓她憑該片贏得第二十二屆香港電影金像獎影后，是第二位以鬼片稱后的，第一位是梅艷芳的《胭脂扣》。但有別於梅姐，梅姐是做鬼不用叫，心潔真的要叫足全場，靠一副受驚樣及尖叫聲奪后。可惜當年正值沙士，心潔未有親身來港接受這項殊榮。